Hewlêr (Rûdaw) - Nivîskarên Kurd Mevlut Aykoç, Samî Tan û Ronayî Onen hatin desteserkirin.
Lî gorî nûçeya MAyê, hêzên ewlehiyê îro di serdegirtinên malan de nivîskarên Kurd Mevlut Aykoç, Samî Tan û Ronayî Onen hatin desteserkirin.
Mevlut Aykoç li Stenbolê, Samî Tan li Rihayê û Ronayî Onen jî li Amedê ji malên xwe hatin desteserkirin.
Hat zanîn ku nivîskarên Kurd ji ber pirtûka fêrbûna Kurdî ya bibandrol "Hînker"ê hatine desteserkirin.
Îfadeya Serokê Komeleya Ziman û Çanda Kurdî ya Rihayê Samî Tanê li Birîvebiriya Ewlehiya Parêzgeha Rihayê hat standin.
Hat îdiakirin ku Hînker "materyaleke perwerdehiya îdeolojîk a rêxistinê" ye.
Ji Samî Tan pirsên derbarê pirtûka fêrbûna Kurdî "Hînker"ê hatin kirin ku wî bi hevkariya Ronayî Onen, Mevlut Aykoç û Mehmet Sadik Varlî sala 2010an de amade kiriye.
Sedema amadekirina asta 3yemîn a "Hînker"ê hat pirsîn ku ji aliyê Enstîtuya Kurdî ve salên 2010, 2011 û 2012an ji bo weşanê hatiye amadekirin.
Samî Tan diyar kir ku "Hînker" ji bo kursên taybet ên zimanê Kurdî hatiye amadekirin.
Karê îfadesdayîna Tan a li rêvebirya qediya lê dema desteserkirina wî bi qasî rojekê hat dirêjkirin.
Tê gotin ku hêzêne ewlhiyê dê sibe Samî Tan bişîne dadgehê.
Li aliyê din Hevserokên DEM Partiyê Tuncer Bakirhan û Tulay Hatîmogullariyê li ser hesabên xwe yên medyaya civakî derbarê desteserkirina her sê nivîskaran nerazîbûn nîşan da û xwest ku demildest bên berdan.
Hevserokê DEM Partiyê Tuncer Bakirhan got:
“Di serdemeke wiha de ku Tirkiye bi banga Civaka Demokratîk û Aştiyê dest bi pêvajoyeke nû dike, ev guvaşên nehiqûqî yên li dijî kedkarên zimanê Kurdî nayên qebûl kirin.
Ev operasyon zererê didin hêviyên demokrasî û aştiyê.
Desthilat û daraz divê dawiyê li vê nehiqûqiyê bînin û divê kesên hatine desteserkirin bilez bên berdan.”
Hevseroka DEM Partiyê Tulay Hatîmogullariyê jî di peyama xwe de anî ziman:
“Kedkarên zimanê Kurdî Mevlut Aykoç, Samî Tan û Ronayî Onen divê bilez bên berdan.
Ev destserkirin ji bilî gihandina zererê ya hêviya aştiyê ne tiştek e.
Divê desthilat demildest dest ji vê helwesta xwe berde.
Divê ji bo Tirkiyeya demokratîk ku civak bi hesret li bendê ye gav bên avêtin.”
