Hewlêr (Rûdaw) - Serokkomarê Tirkiyeyê û Serokê Giştî yê AK Partiyê Tayyîp Erdogan got, “Em yekparçeyiya axa Sûriyeyê, aramî û ewlehiya wê ji ya xwe cuda nabînin.”
Erdogan di 4emîn merasîma vekirina Foruma Dîplomasiyê ya Antalyayê axivî:
"Em nikarin destûrê bidin ku derfeta ku piştî şoreşa 8ê Kanûna Pêşîn ne tenê li Sûriyeyê lê li hemû herêma me ji bo aramiya mayînde derketiye holê, pûç bibe.
Em naxwazin ku Sûriye bikeve nav zivirokeke nû ya bêîstiqrariyê.
Ez bi taybetî dixwazim bibêjim ku em yekparçeyiya axa Sûriyeyê, aramî û ewlehiya wê, ku 911 kîlometre sînorê me pê re heye, ji ya xwe cuda nabînin.
Birayên me yên Sûriyeyî ji şer, êş û zilmê têr bûne.
Ew kesên ku dixwazin van tiştan ducare li wan bikin, divê hesabên xwe li gorî vê yekê bikin.
Divê kesek aram û sebra me, helwesta me ya çareserkirina pirsgirêkan bi rêya diyalogê şaş şîrove neke; divê hedara me hinek kesan nexe nav hewesên çewt.
Em li ser xala parastina yekparçeyiya axa Sûriyeyê û aramiyê, bi taybetî bi cenabê Trump û cenabê Putin re li gel hemû aktorên herêmê di nava diyalogeke pir nêzîk de ne.”
“Tirkiye dikare ewlehiya Ewropayê biparêze”
Serokkomarê Tirkiyeyê amaje bi pêwendiyên Tirkiye û Yekîtiya Ewropayê (YE) jî kir û wiha domand:
“Careke din hat dîtin ku bêyî Tirkiyeyê ewlehiya Ewropayê nayê fikirîn. Tirkiye di paşerojê de jî amade ye ku berpirsyariya ewlehiya Ewropayê hilgire ser xwe.
Îdia û rexneyên ku dibêjin Tirkiye ji armanca Yekîtiya Ewropayê dûr dikeve, li ber çavên me ti nirxê wan nîne.
Îro hin welatên Ewropayê mixabin nikarin wê tîrêj, wêrekî û nêrîna stratejîk ku berî sê çarîkên sedsalê jiyan dabû YEyê, nîşan bidin.
Eger Yekîtiya Ewropayê dixwaze di sîstema cîhanî ya ku ji nû ve tê avakirin de bi awayekî ku heq dike, were temsîlkirin û ser ceribandina heyî bikeve, divê Tirkiye wekî endameke temam bigihêje kursiya xwe.
Em ji bo pêşvebirina pêvajoya endametiyê amade û bibiryar in. Em ji YEyê li bendê ne ku gavên berbiçav biavêje.
Bêyî pîşesaziyeke parastinê ya xurt, siyaseta derve ya xurt nabe.
Em wekî Tirkiye, xwebaweriya xwe ya îro deyndarê pêşketinên xwe yên di warê pîşesaziya parastinê de ne.
Îro em di vî warî de gihiştine asta ji sedî 80î ya xwemalîbûnê. Bi vî awayî, em êdî dikarin ser lingên xwe bisekinin.
Em bi firokeyên bê mirov ên çekdar û bêçek, gemiyên xwe, tankên xwe, roket û fuzeyan û gelek şiyanên xwe, di ser dabînkirina hewcehiyên xwe re derbas bûne.
Em di armanca bazirganiya 100 milyar dolarî ya bi Amerîkayê re girîngiyeke mezin didin.
Ez bawer dikim ku di serdema duyem a Serok Trump de, têkiliyên me bi Amerîkayê re di her warî de dê pêş bikevin bi saya dostaniya min a nêzîk a bi wî re.
Di parastina yekparçeyiya axa Sûriyeyê de, em bi Trump û Putin li pêş, di nava lihevtêgihîştin û diyalogeke nêzîk de ne bi aktorên ku xwedî bandor in li herêmê re."
