Hewlêr (Rûdaw) - Dadgeha Bilind a Federal a Îraqê ew giliyê parlamenterê Kurdistanê red kir ku tê de dihat xwestin xula şeşem a Parlamentoya Kurdistanê wekî "neyasayî" bê naskirin.
Ofîsa Ragihandinê ya Dadgeha Federal îro (18ê Çiriya Paşîn a 2026an) biryara dadgehê eşkere kir.
Li gorî daxuyaniyê, dadgehê giliyê bi hejmara (211/Federal/2026) red kiriye ku 26ê Çiriya Pêşîn a 2026an hatibû tomarkirin.
Rûniştin bi beşdariya hemû dadweran bû
Rûniştina dadgehê bi serokatiya Serokê Dadgeha Federal Dadwer Munzir Îbrahîm Husên û bi amadebûna hemû dadwerên endam hat lidarxistin.
Di civînê de giliyê ku li dijî Serokê Parlamentoya Kurdistanê hatibû tomarkirin hat nirxandin.
Gilîkar di daxwaza xwe de xwestibû ku domandina karên xula şeşem a Parlamentoya Kurdistanê wekî nedestûrî bê ragihandin û rêkarên yasayî yên piştî biryarê bên pêkanîn.
Dadgeh: Ne di desthilata me de ye
Dadgeha Federal di daxuyaniya xwe de destnîşan kir ku li gorî madeya (93/1) a Destûra Îraqê ya sala 2005an, erka wan tenê çavdêrîkirina yasa û rêziknameyên berkar e.
Dadgehê tekez kir ku mijara domandina xula şeşem a Parlamentoya Kurdistanê ne di çarçoveya desthilata wê de ye.
Di dawiya daxuyaniyê de hat gotin ku destnîşankirina sînorên desthilata dadgehê mijareke giştî ye û dadgeh bi xwe biryarê li ser dide, tevî ku aliyên gilînameyê qala wê nekiribin jî.
Hat ragihandin ku gilîname bi yekdengî hatiye redkirin û li gorî madeya 94an a destûrê hemû alî û desthilat pêbendî wê biryarê ne.
Ji aliyê din ve, 15ê Çiriya Paşîn a 2026an Dadgeha Bilind a Federal a Îraqê bi serokatiya Dadwer Munzir Îbrahîm Husên û bi beşdariya endamên xwe civiyabû.
Dadgehê di wê rûniştinê de du daxwazên ji bo fermana awarte yên li ser rûniştina Parlamentoya Kurdistanê gotûbêj kiribûn û her du jî red kiribûn.



