Dusseldorf (Rûdaw) - Werzişvanê Kurd Sîvan Azad Xelîl li Norweçê dest bi geşteke 2222 kîlometreyî ya bi peyatî kiriye.
Yek ji welatên herî bedew û efsûnî yên Ewropayê Norweç e.
Piraniya Kurdên wir ku hûn bi wan re diaxivin ji jiyana xwe û bedewiya xwezayî ya li wir razî ne.
Ew çalak in û bi rastî jî gelekî navên wan di medyaya wir de têne weşandin.
Sîvan Azad Xelîl du hefte ne ji bakurê Norweçê ber bi başûrê Norweçê ve bi peyatî dimeşe.
Êvara beriya destpêkirina rêwîtiya xwe, ew bû mêvanê Diyasporayê û rave kir ku ew dixwaze 2222 kîlometreyan bi peyatî bimeşe da ku spasiya xwe ji Norweçiyan re diyar bike û Kurdan jî baştir bi wan bide nasîn.
Van rojan gelek kesan peyamên vîdeoyî û nivîskî ji Sîvan Azad Xelîl re şandine.
Di nav wan de Şivan Perwer heye ku destsaxiyê lê dike û bi ken jê re dibêje ku mesafeya ku ew dixwaze derbas bike pir dirêj e!
Sîvan Azad Xelîl bû mêvanê bernameya Diyasporayê û got ku rêwîtiya wî li bajarokê Lindznesê li xala herî başûr a Norweçê dest pê kir û dê ber bi Noorkapê ve bidome ku li xala herî bakur a welêt e.
“Divê mirov bixebite û bi berdewamî çalakiyên wî hebin”
Sîvan Azad got, "Ez çalakiyên xwe wekî çalakiyên jiyanê dibînim. Ez ne werzişvanek im û ne jî çalakvanek im lê ez kesek im ku Xwedê min afirandiye.
Divê mirov bixebite û bi berdewamî çalakiyên wî hebin."
Gera Sîvan bi Roja Greenlove re hevdem e ku rojeke pîroz e ji bo Norweçiyan.
Rêwîtiya dê bi qasî sê heta çar mehan bidome
Li gorî bernameya werzişvanê Kurd, rêwîtiya wî dê bi qasî sê heta çar mehan bidome.
Sîvan hîn her di rê de ye û ji wir bû mêvanê Diyasporayê û got ew niha li Buglandê ye û heya niha 150 kîlometre biriye û ji ber ba û baranê nekatiye bêhtir bimeşe lê dibêje "Ez dê berdewam bikim heta ku bigihîjim armanca xwe."
“Şivan Perwer ji bo min sembolek e”
Derbarê vîdeoya ku hunermendê Kurd ê mezin Şivan Perwer jê re şandiye, got:
“Ez spasiya mamosta mezin Şivan Perwer dikim û ew ji bo min sembolek e.
Vîdeoya wî ji bo min enerjiyeke mezin e."
