Serok Barzanî pîrozbahî li stêrkê Kurd Badîn Heso kir

Hewlêr (Rûdaw) - Serok Barzanî pîrozbahî li boksorê Kurd Badîn Heso kir û got, "Cihê serbilindiyê ye ku ciwanên Kurd navê Kurd û Kurdistanê bi cîhanê didin nasîn."

Serok Mesûd Barzanî di peyamekê de ku ji aliyê Baregeha Barzanî ve hatiye belavkirin, pîrozbahî li wî werzişkarê Kurd kir.

Stêrkê Kurd ê Kîkboksê Badîn Hesoyê Zozanî li Almanyayê di pêşbirka kîkboksê ya (INTERNATIONAL WBC) de bi ser ket û kembera WBCyê (WBC belt) stand.

Peyama Serok Barzanî

Serok Barzanî di peyama xwe de got:

"Ez pîrozbahiyê li lehengê Kurd Badîn Heso dikim ku li Almanyayê di şampiyoniya INTERNATIONAL WBCyê de serkeftin tomar kir û sêyemîn kembera xwe bi dest xist."

Serok Barzanî destnîşan kir ku ew destxweşiyê li Badîn Heso dike û hêviya serkeftinên zêdetir ji wî re dixwaze û li pey çû:

"Cihê kêfxweşî û serbilindiyê ye ku ciwanên Kurd li qadên navneteweyî yên werzişê serkeftinên mezin bi dest dixin û navê Kurd û Kurdistanê bi cîhanê didin nasîn."

Serkeftina Badîn Heso

Stêrkê Kurd ê Kîkboksê Badîn Heso Zozanî serkeftineke mezin bi dest xist û kembera WBCyê bir malê.

Li bajarê Oberhausenê ya Almanyayê, Badîn Heso derket pêşberî Victor Vicente Coreayê Meksîkayî.

Wî careke din şiyan û asta xwe ya bilind nîşan da û bû şampiyon.

Badîn Heso bi hêzeke mezin rûbirûyî hevrikê xwe bû.

Derbên boksorê Kurdistanî ew qas bi hêz bûn ku lîstikvanê Meksîkayî nekarî 3 xulekan jî li ber xwe bide û Badîn pêşbirk di berjewendiya xwe de bi dawî kir.

Dengê def û zirneyê olan da

Bi qezenckirina pêşbirkê û bidestxistina kemberê re, dengê def û zirneyê li salonê olan da.

Hemû beşdaran navê lîstikvanê Kurd qîriya.

Hakem destê Badîn Heso bilind kir û boksorê ji Şêxana Başûrê Kurdistanê bû şampiyon.

Wî destkefteke din a girîng li karwanê xwe yê werzişê zêde kir.

Badîn Heso heta niha 23 pêşbirkên boksê lîstine.

Wî hemû pêşbirkên xwe qezenc kirine û heta niha di ti pêşbirkan de dernedaye.

Kember diyarî Serok Barzanî û Pêşmergeyan kir

Badîn Heso piştî pêşbirkê û bidestxistina kemberê ji Rûdawê re axivî û kêfxweşiya xwe ya ji bo serkeftinê nîşan da û anî ziman:

"Ev kember diyarî Serok Barzanî, hemû Pêşmergeyan û malbatên şehîdan be.

Ez spasiya hemû kesên ku di pêşbirkê de piştgirî da min dikim."