Hewlêr (Rûdaw) - Di hilbijartinên navberê yên Amerîkayê de namzeda Demokrat Keisha Lance Bottoms, wekî yekem parêzgara jin a çermreş a eyaleta Georgiayê hat hilbijartin.
Li New Hampshireyê jî Chris Pappas, bû yekem mêrê hevzayend ê ku ji bo Senatoya Amerîkayê hat hilbijartin.
Demokratan her wiha posta parêzgariya New Yorkê jî ji dest neda.
Li Amerîkayê hejmartina dengên hilbijartinên navîn didome.
Demokratan bi encamên xwe yên li Georgia û New Hampshireyê dîrok nivîsand.
Li Georgiayê namzeda Partiya Demokrat Keisha Lance Bottoms, hevrikê xwe yê Komarî Rick Jackson li pey xwe hişt.
Bi vî awayî ew wekî yekem parêzgara jin a çermreş a eyaletê hat hilbijartin.
Li gorî encamên nefermî Bottoms, di dîroka Amerîkayê de bû yekem jina çermreş a ku tê ser erkê parêzgariyê.
Bottomsa ku berê Serokatiya Şaredariya Atlantayê dikir, li Georgiayê hem wekî yekem jina walî hem jî wekî yekem waliya çermreş a yekkete nav qeydan.
Bottoms dê cihê parêzgarê Komarî Brian Kemp bigire ku dema erkê wî qediyaye.
Bi vê encamê li Georgiayê piştî 24 salan posta parêzgariyê ji Komariyan derbasî Demokratan bû.
Li eyaletê herî dawî sala 1998an namzedekî Demokrat di hilbijartina parêzgariyê de bi ser ketibû.
Georgia bû yek ji navendên girîng
Georgia, salên dawî di hilbijartinên federal de bûye yek ji navendên girîng ên pêşbaziya di navbera her du partiyan de.
Partiya Demokrat, li seranserê welêt piştgirî da kampanyaya Bottomsê.
Gelek siyasetmedarên navdar ên Demokrat jî li cem namzeda xwe cih girtin.
Serokê berê yê Amerîkayê Barack Obama jî bi vîdeoyekê piştgirî da Bottomsê.
Bottoms di navbera salên 2018 û 2022yan de Serokatiya Şaredariya Atlantayê kiribû.
Wê demê ew rastî rexneyên Komariyan hatibû.
Li New Hampshireyê yekem senatorê mêr ê hevzayend
Li New Hampshireyê jî endamê Encûmena Nûneran ê Demokrat Chris Pappas, Senatorê berê yê Komarî John Sununu têk bir.
Bi vî awayî wî kursiyê Senatoyê yê eyaletê di destê partiya xwe de hişt.
Chris Pappasê 46 salî, ji sala 2018an ve li Encûmena Nûneran dixebite.
Li gel encama hilbijartinê Pappas, bû yekem mêrê hevzayend ê ku ji bo Senatoya Amerîkayê hat hilbijartin.
Demokratan parêzgariya New Yorkê jî ji dest neda
Li eyaleta New Yorkê ya ku Demokrat lê bihêz in, parêzgarê niha Kathy Hochul kursiyê xwe parast.
Hochula 68 salî, hevrikê xwe yê Komarî Bruce Blakeman li pey xwe hişt.
Li gorî encamên nefermî, wê mafê wê yekê bi dest xist ku çar salên din waliyê bike.
Hochul sala 2021ê piştî îstifaya Waliyê wê demê Andrew Cuomo, bûbû yekem waliya jin a New Yorkê.
Di hilbijartinên 2022yan de ew 6 puanan ketibû pêşiya Lee Zeldinê Komarî û ji bo demek tam hatibû hilbijartin.
Li Amerîkayê di hilbijartinên navîn de hejmartina dengan didome.
Tê çaverêkirin ku encam bandorê li hevsengiya hêzê ya li Kongreyê bikin.
Her wiha dê ev encam bandorê li qada tevgera siyasî ya Serok Donald Trump a di du salên mayî yên dema peywira wî de jî bikin.
