Hewlêr (Rûdaw) - Wezîrê Karên Derve yê Awisturyayê Alexander Schallenberg got, “Herêma Kurdistanê şirîkekî girîng û pêbawer ê Awisturya û Ewropayê ye.”
Konferansa Ewlehiyê ya Munîhê di roja xwe ya duyem de berdewam dike.
Roja ewil a konferansê (doh) Serokê Herêma Kurdistanê Nêçîrvan Barzanî û Wezîrê Karên Derve yê Awisturyayê Alexander Schallenberg li Munîhê hevdîtinek kir.
Alexander Schallenberg bi rêya hesabê xwe yê Xê behsa vê hevdîtinê kir û wêneyê xwe û Nêçîrvan Barzanî parve kir.
Alexander Schallenberg di peyama xwe de cihê nearam ê cografî yê Herêma Kurdistanê bi bîr anî û got:
“Tevî cihê xwe yê cografî yê nearam jî Herêma Kurdistanê şirîkekî girîng û pêbawer ê Awisturya û Ewropayê ye.”
Li hêla din, Serokatiya Herêma Kurdistanê dabû zanîn ku di hevdîtina Schallenberg û Nêçîrvan Barzanî de pêwendiyên Awisturyayê yên bi Îraq û Herêma Kurdistanê re hatine nirxandin.
Serokatiyê da zanîn ku Barzanî û Schallenberg nêrînên xwe yên li ser “şerê li Xezeyê, aloziyên li Rojhilata Navîn, gefên li ser ewlehiya cîhanê û bandora van a xerab” anîn zimên.
Her du aliyan diyar kir ku divê alozî zêdetir nebin û ji bo vê yekê hevkarî were kirin.
Barzanî û Schallenberg ragihand ku her du alî jî dixwazin pêwendiyên Awisturyayê yên bi Îraq û Herêma Kurdistanê bi pêş bikevin.
Wezîrê Karên Derve yê Awisturyayê Alexander Schallenberg ragihand ku Awisturya girîngiyeke zêde dide pêwendiyên bi Îraq û Herêma Kurdistanê re û Nêçîrvan Barzanî vexwend welatê xwe.
Schallenberg piştre jî pirsên nûçegihanê Rûdawê Zinar Şîno bersivandibûn û gotibû, “Êrişa Îranê ya li Hewlêrê nayê qebûlkirin.”
Met with @IKRPresident Nechirvan Barzani at the margins of the #MSC2024. In a volatile neighbourhood, the @Kurdistan Regional Government is an important & reliable partner for Europe and Austria. pic.twitter.com/2z2gX2xge6
— Alexander Schallenberg (@a_schallenberg) February 17, 2024
