Hewlêr (Rûdaw) - Serokê Yekîtiya Bawermendên Kevnar ên Cîhanê Leonid Sevastyanov ku bi Papa Francis re hevdîtinek taybetî kiriye, behsa sê kesên ku dibe ku bibe Papayê nû kir.
Li gorî Serokê Yekîtiya Bawermendên Kevnar ên Cîhanê Leonid Sevastyanov, Kardînal Claudio Gugerotti, Kardînal Pietro Parolin û Kardînal Matteo Zuppi di nav namzedên bihêz ên bibin Papayê nû de cih digirin.
“Papa gelek caran Gugerotti derxistiye pêş”
Leonid Sevastyanov bal kişand ser Serokê Komîsyona Dêrên Rojhilat Kardînal Claudio Gugerotti û got:
"Kardînal Gugerotti di mijarên têkildarî Ukrayna û dêrên din ên Rojhilat de kesayetiyekê girîng e.
Ew ji aliyê Papa Francis ve gelek caran hatiye bipêşxistin, heta ku gelek caran erkê birêvebirina ayînên îniyê daye wî."
“Pietro Parolin bi hewlên xwe ya aştiyê tê naskirin”
Sevastyanov wekî namzedê duyem navê Wezîrê Karên Derve yê Vatîkanê Kardînal Pietro Parolin da û derbarê wî de jî wiha got:
"Parolin dîplomatek e ku nêrîn û dîtina Papa didomîne. Ew bi hewlên xwe yên ji bo aştiya cîhanê û xebatên xwe yên ji bo xurtkirina têkiliyên di navbera Amerîka, Ewropa, Rûsya û Çînê de tê naskirin.
Di heman demê de wî gavan avêtine da ku bandora Dêra Katolîk a li cîhanê zêde bike."
“Papa baweriya xwe bi Matteo Zuppi dianî”
Sevastyanov Kardînal Matteo Zuppi, yê ku ji aliyê Papa Francis ve sala 2022an ji bo gotûbêja krîza Ukraynayê şandibû Moskowayê jî wekî namzedê sêyem destnîşan kir û got:
"Hem Zuppi û hem jî Parolin kesên ku Papa ew perwerde kirine û baweriya xwe bi wan tîne ne.
Her du jî bawer dikin ku diyaloga di navbera aliyên pevçûnê de girîng e.
Ji ber vê sedemê Kardînal Zuppi jî dibe ku di hilbijartina papatiyê de roleke girîng bilîze."
Sevastyanov tekezî li ser wê yekê kir ku îro gelek Katolîk dixwazin Papayekî ku di heman demê de Îtalî be hebe, ji ber ku ji Papa John Paul II ve vir ve demeke dirêj e ev meqam ji aliyê biyaniyan ve tê birêvebirin.
Vatîkanê duh ragihand ku Papa Francis koça dawî kiriye û karûbarên merasîma cenazeyê dest pê kiriye.
Piştî nûçeya mirinê, rêberên cîhanê peyamên sersaxî û dilxweşiyê belav kirin.
.jpg&w=3840&q=75)