Hewlêr (Rûdaw) - Berdevkê Wezareta Karên Derve ya Amerîkayê ragihand ku divê karên xeta boriya petrolê ya di navbera Îraq û Tirkiyeyê de di demeke kurt de ji nû ve dest pê bikin.
Berdevk her wiha got girtîmayîna xetê aboriya Îraq û Herêma Kurdistanê lawaz dike û rasterast zirarê dide kompaniyên Amerîkî.
Li ser pirsa peyamnêrê Rûdawê ya “Gelo di dema dawî de derbarê mijarên budce, petrol û gazê de ti têkiliyeke we bi Hewlêr û Bexdayê re çêbûye? We ji bo hêsankirina diyaloga di navbera her du aliyan de ti rolek lîstiye?” berdevkê Wezareta Karên Derve ya Amerîkayê wiha bersiv da:
“Gelekî girîng e ku Hikûmeta Îraqê, Hikûmeta Herêma Kurdistanê û aliyên din ên pêwendîdar bi lezgînî Xeta Boriya Petrolê ya Îraq-Tirkiyeyê ji nû ve bixin dewrê.
Girtîmayîna xetê rasterast bandorê li ser kar û çalakiyên sê kompaniyên Amerîkî dike.
Ev yek nayê qebûlkirin. Me gelek caran bang li hemû aliyan kiriye.
Divê ew pirsgirêkên xwe çareser bikin û em paşxistineke bêdem qebûl nakin.”
Berdevk diyar kir ku girtîmayîna xeta boriyê ne tenê bipêşketina aboriyê ya Îraqê radiwestîne, di heman demê de pêgeha kompaniyên Amerîkî yên li herêmê lawaz dike û rê li ber zêdebûna bandora Îranê vedike.
Berdevk got, Divê ev pirs were çareserkirin, di demeke herî kurt de jî.
Boriya petrolê ya Îraq-Tirkiyeyê rêyeke alternatîf a giring ji bo gihîştina petrolê bo bazarên cîhanî dabîn dike, ku sûdê digihîne aboriya Îraqê û Herêma Kurdistanê, herwiha wan kompaniyên Amerîkî yên ku li wir kar dikin.
Vekirina wê dê sûdê bigihîne Amerîka, Herêma Kurdistanê, Îraqa federal û herêmê bi giştî."
_(1).webp&w=3840&q=75)
