Hewlêr (Rûdaw) - Hejmara 8em a kovara taybet bi wergera helbestan "LEWerger" derket pêşber xwîneran.
LEWerger kovareke taybet e û barê wergerandina helbestên ji zimanên cuda yên cîhanê ji bo zimanê Kurdî girtiye ser milê xwe.
LEWerger her ji çar mehan carekê derdikeve.
Hejmara heştem a mehên Kanûna Paşîn, Sibat û Adara sala 2025an e.
Hejmara şeşem a kovara LEWergerê ji 64 rûpelan pêk tê û wergerên ji gelek zimanên cîhanê li xwe digire.
Di nav zimanên ku werger ji wan hatine kirin de Îngilîzî, Ermenî, Swêdî, Fransî, Erebî, Bulgarî, Rûsî, Almanî û hin zimanên din hene.
Kovar bi Kurmanciya jor û jêr û Kirmanckî (Zazakî) wergeran diweşîne.
Di vê hejmarê de, helbestên gelek helbestkarên naskirî yên cîhanê hatine wergerandin û di kovarê de cih girtiye.
Hejmara 8an a Kovara LEWergerê ji Weşanên NAyê derket.
Komîteya weşana kovarê ji van kesan pêk tê: Miradê Miradan, Berfîn Huseynî û Yeqîn H.
Edîtorên hejmara 6an jî ev in: Yeqîn h., Samî Hêzil, Azad Rêbiwar, Seyîdxan Kurij, Mizgîn Savci, Jiyar Homer, Alan Hemo.
Kerem kin..😊
— LEWerger (@lewerger_) December 31, 2024
Va ye LEWerger bi hejmara xwe ya 8em #Derket.🥳 pic.twitter.com/wAsGQxQ9Ep
Editorya kovarê li ser hejmara 8an wiha got:
"Bi hejmareke mişt û bi naverokeke xaşêlî em li hafa we ne.
LEWerger hejmar bi hejmar ciwantir digivire, delaltir distewe û li derava xwe zêde dike.
Em niva jê piştrast û têrserwext in ku heyama destpêkê rabihurî. Û wext e êdî; em ê peng û hêdî berî bidin bihurk û beyarên negîsinkirî.
Naveroka vê hejmarê navên nû ye: Ku we LEW girt destê xwe û we pel û rûpel lê qulipand, hûn ê tavilê lê bivarqilin ku hema sercem tekst û helbestkarên di vê hejmarê de di kurdî de nenas in.
Pêkan e ku hûn hinan jê wekî nav binasin an jî wê navê hin helbestên wan bihîstibin, lê wekî werger di kurdî de nû ne.
Me xwest bi vî awayî em berdiyê li xwe û we biguherînin; daw û delingan li avên nû hilkin!
Axir, em qenc dizanin ku wêjeya tu welatî hew bi çend navan nebûye wêje û hela jî helbesta tu welatekî bi tenê ji çend navan pêk nehatiye!
Tevî wergêrên LEWê, me hewl da ku nemaze jî em rê bibin ser navên ku rê bi ser neketine; navên ku li taldeyan hatine jibîrkirin û navên ku wan û tekstên xwe ro nedîtine! We divê vê kira me wekî jest an diyariyeke sersalê yan jî wekî pêşgavêndestpêkeke nû qebûl bikin...
Ji vê hejmarê pê ve em ê îcar tematîk bixebitin; naveroka hejmara bê helbestên jinan e, hejmara dîtir jî hez û eşq/evîn e û hejmarên piştre jî wê şer û şoreş, koçberî û sirgûn û hwd. bin.
Her wiha, di demên pêş de wê ji bo xwendevanên kurdî surprîzeke me hebe; li bendê bin.
Spasiyeke delal ji bo aboneyên me tevan û nemaze jî ji bo her du xemxurên kurdî yên têra xwe hêja kek Omer Guneş û kek Îbrahîm Şahîn... ku ji destpêkê ta niha piştevaniyeke pirhêl dan me: Her hebin, dostanî heqê we...
Û gotina dawiyê, em spasî û malavahiya kekê hêja Nedîm dikin ku piştevaniya me kir û bû sponsorê vê hejmara LEWê"
