Wezareta Çandê ya Tirkiyeyê koleksiyona Alexandre Jaba ya Kurdî çap kir
Hewlêr (Rûdaw) - Koleksiyona Kurdî ya Alexandre Jaba ku mînakeke wê sala 2013an ji Rûsyayê bi serperiştiya Prof. Dr. Kadrî Yildirim ji bo Pirtûkxaneya Beşa Kurdolojiyê ya Zanîngeha Artukluyê ya Mêrdînê hatibû anîn, ji aliyê Wezareta Çandê ya Tirkiyê ve hat çapkirin.
Arşîva koleksiyona Kurdî ya Alexandre Jaba ku di navbera salên 1848 û 1866an de li Bakurê Kurdistanê hatibûye komkirin, sala 2013an di encama xebata Beşa Kurdolojiyê ya Zanîngeha Artukluyê ya Mêrdînê hatibû anîn û di Pirtûkxaneya Beşa Kurdolojiyê de cih girtibû.
Daxuyaniya Gulşen Orhanê
Serşêwirmenda Serokkomarê Tirkiyeyê Gulşen Orhanê doh li ser hesabê xwe yê Xê ragihand ku koleksiyona Alexandre Jaba ya arşîva herî girîng a berhemên klasîk ên Kurdî ji aliyê Wezareta Çandê ve hatiye weşandin.
Serşêwirmenda Serokkomarê Tirkiyeyê Gulşen Orhanê got:
“Ev arşîva ku berhem û destnivîsên klasîk ên Kurdî yên biqîmet dihewîne, encama hewldaneke hevkariyeke demdirêj a di navbera me û profesorên Beşa Ziman û Çanda Kurdî ya Zanîngeha Artukluyê ya Mêrdînê de ye.”
Şêwirmenda Erdogan diyar kir ku koleksiyon wekî 15 bergan hatiye weşandin û bi tevahî 69 nusxeyên destnivîsan dihewîne ku ji 39 berhemên cuda pêk tên.
Alexandre Jaba û koleksiyona Kurdî
Alexandre Jaba salên 1848 û 1866an li parêzgeha Erziromê ya Bakurê Kurdistanê balyozê Rûsyayê bûye.
Bi rêya alimê navdar ê Kurd Mele Mehmûdê Bazîdî û hinek zanyarên din dest bi xebata komkirina destxetên berhemên klasîk ên Kurdî kiriye û arşîveke dewlemend pêk aniye.
Jaba arşîva xwe biriye Pirtûkxaneya Neteweyî ya Rûsyayê ya li bajarê St.Petersburgê.
Arşîva Jaba ji 54 beş û 4017 rûpelan pêk tê.
Di nav de gelek berhemên girîng ên klasîk ên Kurdî yên wekî Mem û Zîna Ehmedê Xanî, Mewlûda Melayê Batê, helbestên Feqiyê Teyran, Adat û Rusûmatnameyê Ekradiye ya Mele Mehmûdê Bazîdî û destanên Leyla û Mecnûn û Yûsif û Zuleyxayê hene.
Her wiha wergera Şerefnameya Şerefxanê Bedlîsî û ji folklora gelêrî ya Kurdan stran, kilam, lawij û çîrok û destanên cur bi cur hene.