Hewlêr (Rûdaw) - Yekîtiya Dildarên Kurd (DILKURD) ragihand ku ew nebûna Prof. Dr Kadrî Yildirim di xebatên xwe yên li ser Kurdî yên 4 salên borî de hîs dikin.
4 sal di ser koçkirina dawî ya zimanzan, akademîsyen û lêkolînerên Kurd Profesor Dr. Kadrî Yildirim re derbas bûn.
Yekîtiya Dildarên Kurd bi daxuyaniyekê Kadrî Yildirim bi bîr anî ku 26ê Adara 2021ê li Amedê 62 salî de koça dawî kir.
DILKURD diyar ku Kadrî Yildirim ji bo ku cih ji Kurdî re veke kedeke mezin da û got, “Xebatên wî yên di warê edebiyata Kurdî ya klasîk, dîroka zimanê Kurdî û rêzimana Kurdî de, îro jî hîmên cîhana akademîk a Kurdî ne.”
“Jiyana xwe di rêya ziman Kurdî re derbas kiriye”
Ev daxuyaniya DILKURDê ya derbarê Kadrî Yildirim e:
“Prof. Dr Kadrî Yildirim 4 sal berê wefat kir ku jiyana xwe di rêya ziman, wêje û dîroka Kurdî de derbas kiriye.
Kadrî Yildirimê ku me bêwext winda kir, jiyana xwe bi têkoşîna zindîkirina zimanê Kurdî, bi pêşxistina wî û dayîna nasnameya akademîk derbas kir.
“Em nebûna wî hîs dikin”
Em nebûna wî di xebatên xwe yên li ser Kurdî yên 4 salên borî de hîs dikin.
Kadrî Yildirim ku di heman demê de xwedî çand û zimanzan e, ji bo ku cih ji Kurdî re veke kedeke mezin da.
“Xebatên wî îro jî hîmên cîhana akademîk a Kurdî ne”
Xebatên wî yên di warê edebiyata Kurdî ya klasîk, dîroka zimanê Kurdî û rêzimana Kurdî de, îro jî hîmên cîhana akademîk a Kurdî ne.
Kadrî Yildirim ne tenê di çarçoveya zanistî de ma, her wiha berhemên ku li ser ziman û jiyana rojane ya gel hiştiye.
Xebatên ferhengê dewlemendiya termînolojîk a Kurdî derxistiye holê û ji sazîbûna zimên re bûye alîkar.
“Bi zanîn û pênûsa xwe doza neteweya xwe parast”
Kadrî Yildirimê ku bi zanîn û pênûsa xwe doza neteweya xwe parast, tevî siya siyaset û zilmê jî xwendina xwe ya zanistî domand, li hemberî astengiyên li pêşiya Kurdî berxwedaneke akademîk nîşan da û her tim ji xwendekarên xwe re dida zanîn ku ziman meseleya nasnameyê ye.
Em mîmarê pirfonîk ê ziman û wêjeya Kurdî Kadrî Yildirim di salvegera 4mîn a wefata wî de bi hezkirin û minetdarî bi bîr tînin û bi berpirsyariya parastina mîrateya mezin ku li pey xwe hiştiye, li ber bîranîna wî serê xwe ditewînin.”
