Îbrahîm Muslîm: Saziyên dewletê dê di demeke nêzîk de vegerin Kobaniyê

Piştî guherînên siyasî yên li Sûriye û Rojavayê Kurdistanê mijara birêvebirina herêmên cuda û vegera saziyên dewletê bûye rojeva sereke.

Herêma Kobaniyê jî yek ji wan deveran e ku di qonaxa veguhastinê de bi guherînên îdarî û xizmetguzariyê re rûbirû ye.

Hikûmeta demkî ya Sûriyeyê ji bo birêvebirina vê herêmê Îbrahîm Muslîm wekî birêvebir erkdar kiriye.

Îbrahîm Muslîm niha li Cerablûsê karên xwe dimeşîne lê amadehiyên dawî dike ku bi fermî derbasî nav bajarê Kobaniyê bibe û dest bi qonaxeke nû ya îdarî bike.

Di vê qonaxê de, dabînkirina xizmetguzariyên bingehîn ên wekî av, elektrîk û tenduristiyê di serê lîsteya karên birêvebiriya nû de ne.

Her wiha, nûjenkirina dibistanan û diyarkirina çarenivîsa saziyên xwendina bilind wekî pirsgirêkên sereke li benda çareseriyê ne.

Birêvebirê nû yê Kobaniyê diyar dike ku ew di avakirina kadroyên xwe de giranî didin ser ciwanên xwedî bawername û xelkê resen ê herêmê.

Ev yek wekî beşek ji "peymana entegerasyonê" tê dîtin.

Birêvebirê Kobaniyê yê Hikûmeta demkî ya Sûriyeyê Îbrahîm Muslîm li ser van mijaran û planên paşerojê pirsên Nalîn Hesênê bersivandin.

Rûdaw: Ji bo axaftina li ser rewşa birêvebirina herêma Kobaniyê û paşeroja qonaxa bê di bin sîwana pirsgirêkên xizmetguzarî û îdarî de, li gel planên bipêşxistina binesaziyê û başkirina rewşa perwerde û xizmetguzariyên sereke, ez îro mêvandariya birêz Birêvebirê herêma Kobaniyê Îbrahîm Muslîm dikim. Mêvanê min ji Cerablûsê li gel me ye, bi xêr hatî birêz Îbrahîm.

Îbrahîm Muslîm: Silav.

Rûdaw: Gelo we bi awayekî fermî dest bi karê xwe wekî birêvebirê herêma Kobaniyê kiriye û kar û barên wê ji kû derê tên birêvebirin?

Îbrahîm Muslîm: Helbet, nêzîkî du mehan berê ez ji bo vî karî hatim erkdarkirin. Herêm xwedî çar nahiyeyan e, bajarê sereke Kobanî ye û nahiyeyên Çelebî, Sirrîn û Şiyûxê ne. Em niha ji bo dabînkirina xizmetguzariyên bingehîn ên wekî elektrîk, av û xizmetên tenduristiyê ji bo vê herêmê kar dikin.

Wekî hûn dizanin, ev herêm berê ji aliyê rejîmê ve hatibû paşguhxistin û pêdiviya wê bi gelek tiştan heye. Me ji bo mekanîzmaya kar li vê herêmê plan danîne. Tîmên pispor li ser vî alî kar dikin. Ji ber ku em di dawiya sala xwendinê de ne, em giranî didin ser nûjenkirina dibistanan, amadekirina wan û navendên tenduristiyê.

Her wiha, sererastkirina pompeyên avê yên li ser Çemê Feratê da ku av bi awayekî berdewam peyda bibe di rojeva me de ye. Em sererastkirina xetên voltaja bilind ên elektrîkê li vê herêmê dikin da ku demjimêrên elektrîkê ji yên niha zêdetir bibin, ji ber ku em ji hejmara demjimêrên ku ji welatiyan re tên dayîn ne razî ne.

Rûdaw: Birêz Îbrahîm, dema min pirsa destpêkê kir, mebesta min hebûna we bi xwe li Kobaniyê bû.

Îbrahîm Muslîm: Bajarê Kobaniyê di çarçoveya peymana entegerasyonê de ye û peymana entegerasyonê pêdivî bi komîteyên pispor ji bo mekanîzmaya yekxistina saziyan heye. Mesele ne tenê li ser berdewamkirina li vî bajarî ye. Dibe ku ez ji hebûna xwe ya li vî bajarî zêdetir xizmeta bajêr bikim. Ez bi awayekî herdemî serdanan dikim û bi saziyên li parêzgeha Helebê re li ser mekanîzmaya piştgiriya xizmetguzariyan li vî bajarî di nava pêwendiyan de me. Kar didome û înşallah di nêzîk de em ê bikevin bajêr û dest bi kar bikin. Divê di her rewşê de mekanîzmayek û planek diyar hebe da ku dema em bikevin vî bajarî, xelk li benda xizmetguzariyan bin.

Fikir ne ew e ku ez li vî bajarî bim û li baregehekê rûnim, bi qasî ku xelk li benda pêşkêşkirina xizmetguzariyan ji bo vî bajarî ne. Helbet, înşallah derbasbûn dê di nêzîk de be.

Rûdaw: Dema hûn dibêjin di demeke nêzîk de, mebesta we roj an hefte ne? Gelo dîrokek ji bo ketina we ya nav bajarê Kobaniyê hatiye diyarkirin?

Îbrahîm Muslîm: Dîrok nehatiye diyarkirin lê di demeke nêzîk de ye. Dîrokek ji bo derbasbûna vî bajarî nehatiye diyarkirin lê Înşallah derbasbûna dewleta Sûriyeyê ji bo vî bajarî dê di demeke nêzîk de be. Ji ber ku derbasbûna dewleta Sûriyeyê dê bipêşketineke mezin di van xizmetguzariyan de çêbike.

Îro, wekî mînak, dema ku birêvebirê çandiniyê yan birêvebirê elektrîkê li Helebê be û ji vî bajarî dûr be, valahiyek di vê mijarê de çêdibe. Dê derbasbûna saziyan hebe û ez dê jî di demeke nêzîk de bikevim Kobaniyê, ez vê sozê didim we, Înşallah.

Peymana entegerasyonê û vegera saziyan

Rûdaw: Birêz Îbrahîm, hûn di mijara destnîşankirina berpirsên xwecihî li Kobaniyê de gihîştine kû derê? Pîvanên ku tên bikaranîn çi ne? Gelo hûn xwe dispêrin kadroyên birêvebiriyê yên berê an hûn ber bi avakirina birêvebiriyeke bi temamî nû ve diçin?

Îbrahîm Muslîm: Helbet, dibe ku hûn ji damezirandinên li nahiyeya Çelebiyeyê agahdar bin, wekî şaredarî, komek ji xortên ku nû dest bi jiyanê kirine û xwedî bawernameyên zanîngehê yên curbecur in, wekî endezyariya enerjiyê û endezyariya biyolojiyê û yên din.

Her wiha, şaredariya Kobaniyê jî para xwe ji vê yekê wergirtiye. Li gorî bîra min, di şaredariyê de sê endezyarên pispor di warê karê xizmetguzarî de û hin bawernameyên din ên wekî hiqûqê hene. Her wiha, birêvebirê nahiyeyê jî xwedî bawernameya hiqûqê ye.

Em bi tevahî giranî didin ser xwediyên bawernameyên zanîngehê yên pispor ên ku xizmeta welatiyan dikin. Ez giranî didim ser ciwanan, ji ber ku ciwan her dem ber bi jiyanê ve bi kelecan in û ji ber şer derfeta xwe ya rastîn di birêvebirina herêmê de bi dest nexistine. Ez yek ji wan kesan im ku meyla min li ser ciwanên çalak e, her wiha divê bawernameyên wan hebin ku wan ji bo xizmeta vî bajarî jêhatî bikin.

Rûdaw: Gelo hemû kesên ku tên damezirandin ji xelkê Kobaniyê ne?

Îbrahîm Muslîm: Helbet, hemû kesên ku hatine damezirandin. Ev tiştekî mantiqî ye, ev tiştek e ku rewş ferz dike. Li nahiyeya Çelebiyê, hemû kesên ku hatine damezirandin ji xelkê nahiyeyê ne û her wiha li bajarê Kobaniyê jî hemû kesên ku hatine damezirandin ji xelkê vî bajarê xweşik in. Kesek ji derveyî herêmê ne li nahiyeya Çelebiyeyê û ne jî li Kobaniyê hatiye damezirandin û zimanê herêmê vê yekê ferz dike.

Rewşa perwerde û xizmetguzariyan

Rûdaw: Rewşa perwerdehiyê li dibistanan dê çawa be û dê bi kîjan zimanî were dayîn? Çarenivîsa Zanîngeha Kobaniyê jî dê çi be, gelo dê berdewam bike yan planên girtina vê zanîngehê hene?

Îbrahîm Muslîm: Helbet, dosyeya perwerdehiyê dosyeyeke pir girîng e û pêdivî bi karekî zêde heye. Li hin nahiyeyan dibistan bi temamî wêran bûne, hin dibistan pêwîstî bi nûjenkirinê hene û hin dibistan jî wekî navendên sitargehê ne. Dosyeya perwerdehiyê dosyeyeke pir mezin e û yek ji pêşîneyên min e, ji ber ku ez bi xwe mamoste me. Lewma dibe ku ez ji hemû waran zêdetir girîngiyê bidim warê perwerdehiyê ji ber ku ew warê min ê karê sereke ye.

Li ser zanîngehan, dibistanan û bawernameyan, di çarçoveya peymana entegerasyonê de, ev tişt bi Wezareta Xwendina Bilind û Wezareta Perwerdehiyê ve girêdayî ye. Bê guman, hûn dizanin ku pîvan ji bo bawernameyan û pîvan ji bo entegerasyonê hene. Bê guman, birêz wezîrê xwendina bilind û wezîrê perwerdehiyê dê li ser van dosyeyan kar bikin. Dê komîteyên pispor ji bo mekanîzmaya entegerasyonê bên avakirin û di qonaxa bê de rewş dê baş be.

Rûdaw: Hûn kengî pêşbînî dikin ku birêvebiriyên nifûsê û birêvebiriyên din û derxistina pasaportan li Kobaniyê bên çalakirin û gavên ku di vî warî de tên avêtin çi ne?

Îbrahîm Muslîm: Em niha li ser pêvajoya amarekî temam a karê saziyan dixebitin. Ez niha li ser dosyeya çandiniyê, dosyeya nifûsê, dosyeya perwerdehiyê û dosyeya elektrîkê kar dikim. Ev dosyeyên ku demeke dirêj e hatine paşguhxistin û xizmetguzarî pêşkêş nakin û niha em bi nûavakirin û ji nû ve birêxistinkirina van saziyan vedigerin ser kar.

Ez li ser lêgerîna hêz û derfetên heyî li vî bajarî dixebitim da ku bibînim ka kî ji bo birêvebirina qonaxa bê di warê çandiniyê û tenduristiyê de guncaw e. Helbet, hemû jî ji xelkê vî bajarê xweşik in. Em li ser van dosyeyên pir girîng kar dikin.

Dibe ku hin astengî hebin, wekî ku hûn dizanin, piraniya karmendên ku beriya şoreşa Sûriyeyê li ser karê xwe bûn, niha xanenişîn bûne. Ev bajar pêwîstî bi hêzên nû, ciwanên çalak û pisporiyên ciwanên ku nû ji zanîngehan derçûne heye. Em bi wan re û bi gelek kesayetiyên vî bajarî re di nava pêwendiyan de ne da ku bibînin ka kî ji bo birêvebirina vê qonaxê wekî sazî guncaw e. Tişta ku me di vî karî de rehet dike ew e ku bajarê Kobaniyê xwedî gelek hêz û derfetan e.

Rûdaw: Lê birêz Îbrahîm, dema diyarkirî ji bo ji nû ve çalakirina van birêvebiriyan çi qas e, wekî ku we qal kir, çandinî, nifûs û derxistina pasaportan, ev birêvebiriyên xizmetguzariyê ji bo welatiyan?

Îbrahîm Muslîm: Helbet, her saziyek xwedî demekî diyarkirî ye. Ez bawer dikim ku tenduristî li ber destpêkirinê ye. Her saziyek li gorî zehmetî, mezinahî û mekanîzmaya kar û destpêkirina xwe xwedî demekî diyarkirî ye. Ne mimkun e ku hemû sazî bi hev re bên girêdan. Ez pêşbînî dikim ku di çend rojên pêş de karên birêvebiriya tenduristiyê li vî bajarî dest pê bikin û çandinî jî dê di nêzîk de dest pê bike. Fikir ew e ku her saziyek xwedî mezinahî, zehmetî û mekanîzmaya destpêkirina xwe ye.

Bi derbasbûna tam a saziyên dewletê ji bo vî bajarî, ew ê dest bi kar bikin. Em niha wan bi awayekî rast amade dikin. Wekî ku hûn dizanin, em pêwîstî bi agahiyên berê ji karmendên kevin û amarên dosyeyên kevin hene. Em wan ji nû ve birêxistin dikin û bi awayekî rast rêz dikin da ku destpêk çêbibe. Ne mimkun e ku hemû sazî di heman demê de dest pê bikin.

Rûdaw: Spas birêz Birêvebirê herêma Kobaniyê Îbrahîm Muslîm.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger