Hewlêr (Rûdaw) - Li Çiyayê Qereşê ya navçeya Sîdekanê mayîn bi hemwelatiyekî de teqiya û canê xwe ji dest da.
Berpirsê Ragihandinê yê Dezgeha Giştî ya Kar û Barên Mayinan a Hewlêrê Raber Enwer ji Rûdawê re got:
“Îro sibehê çend kes bi hev re çûne Çiyayê Qereşê li sînorê Sîdekanê ji bo anîna giyayên biharê û li wir mayîneki bi kesekî de teqiyaye û canê xwe ji dest daye ku navê wî Nazim Salih e û temenê wî 33 sal e.
Ew zewicî ye û bavê du zarokan e.
Raber Enwer her wiha eşkere kir ku niha termê wî kesî ji cihê bûyerê hatiye anîn û dê sewqî Bijîşkiya Dadî ya Soranê were kirin.
Sîdekan navçeya Rêveberiya Serbixwe ya Soranê ye.
Di vê salê de ev sêyemîn bûyera teqîna mayinê ku li wî sînorê rû dide û ji ber vê yekê du kesan canê xwe ji dest daye û kesek jî birîndar bûye.
Her sê bûyer jî di dema çûna hemwelatiyan a ji bo anîna giyayên biharî de çêbûne.
Dezgeha Giştî ya Kar û Barên Mayinan a Hewlêrê ji welatiyan xwest di dema çûna xwe ya ji bo giyayên biharî de hay ji xwe hebin û beşek ji bilindahî û çiyayên sînorê Soranê heta niha jî mayinên serdema şerê heşt salî yê Îraq - Îranê lê mane û nehatine rakirin.