Hewlêr (Rûdaw) - Şêwirmendê Rêveberiya Xweser a Bakur û Rojhilatê Sûriyeyê Bedran Çiya Kurd ragihand ku meclisên taxên Şêx Meqsûd û Eşrefiyê yên Helebê bi Hikûmeta Sûriyeyê re gihiştine rêkeftinê.
Li gorî gotina Bedran Çiya Kurd dê hêzên Kurdan ên li taxên Şêx Meqsûd û Eşrefiyê li cihên xwe bimînin.
Siyasetmedarê Kurd Bedran Çiya Kurd ji ser Xê behsa hurgiliyên rêkeftinê kir û got:
“Meclisên taxên Eşrefiyê û Şêx Meqsûdê gihîştin lihevkirinekê bi komîteya berpirsyar a Hikûmeta Sûriyeyê re, di gaveke girîng de ber bi asayîkirina rewşê û pêkanîna jiyaneke bi hev re.
Lihevkirin diyar dike ku her du tax dê bi temamî taybetmendiyên xwe biparêzin, di nav de ewlehî, rêvebirî, xizmetguzarî, çand û jiyana siyasî.
Ev yek dê bi hevahengî bi saziyan xizmetguzarî û ewlehiyê yên Helebê re pêk were, bi sazkirina mekanîzmayên taybet ji bo bicihkirina vê yekê.
Her wiha lihevkirin tekez dike ku hêzên ewlehiya navxweyî û kontrolên wan dê li her du taxan bimînin û dê li gor mekanîzmayeke diyarkirî bi Wezareta Navxweyî re kar bikin, bi xurtkirina rola wan a di parastina niştecihan de, bêyî destêwerdana ti komeke çekdar a din.”
“Vegera xelkê Efrînê tê garantîkirin”
Bedran Çiya Kurd amaje bi sîstema perwerdeyê jî kir û got:
“Lihevkirin her wiha behsa guherîna hemû girtiyên her du aliyan dike û diyar dike ku sîstema perwerdeyê dê wekî xwe be heya ku li Bakur û Rojhilatê Sûriyeyê biryareke giştî were dayîn.
Hikûmeta Sûriyeyê ya li Helebê berpirsyariya her hebûna tehdîdekê li dijî van taxan digire ser xwe û soz dide ku dê bi hewlên hevpar rê li ber van tehdîdan bigire.
Lihevkirin her wiha azadiya hatin û çûnê ji bo niştecihên her du taxan li nav bajar û derveyî wê, bêyî her astengî û acizkirinekê, misoger dike.
Her du tax dê di Encûmena Parêzgehê û Odeya Bazirganiyê û saziyên din de bi temamî werin temsîlkirin.
Ev lihevkirin qonaxa yekemîn e ji planeke berfirehtir ku armanca wê garantîkirina vegereke ewle ye ji bo xelkê Efrînê ye û danûstandin ji bo gihîştina vê armancê berdewam dikin.
Lihevkirin tekez dike ku Efrîn, wekî yekeyeke siyasî, erdnîgarî û neteweyî ya tevahî bi Rojavayê Kurdistanê re, dê di danûstandinên paşerojê de xwedî cihekî girîng be.”
