Li Rojhilatê Kurdistanê zererên şer: 599 avahî bi temamî rûxiyan

Hewlêr (Rûdaw) - Di 33 rojên şer de li Rojhilatê Kurdistanê 599 xanî û dukan bi temamî rûxiyan.

Li gorî amara herî nû ya ku Navenda Pêywendî û Agahdariyê ya Wezareta Rê û Bajarsaziyê ya Îranê belav kiriye, di nav 33 rojên şerê Amerîka-Îsraîl û Îranê de, li parêzgehên Rojhilatê Kurdistanê zerer gihîştiye 39 hezar û 101 xanî û dukanan.

Li gorî wê amarê, ji wê hejmarê 599 xanî û dukanan ên li her 5 parêzgehan bi temamî rûxiyane.

Parêzgeha ku herî zêde zerer dîtiye: Kirmaşan

Li gorî amarê, di nav van 33 rojan de parêzgeha Kirmaşanê herî zêde zerer dîtiye.

Ji ber êrişên Amerîka û Îsraîlê zerer gihîştiye 13 hezar û 267 xanî û dukanan û ji wê hejmarê 81 xanî bi temamî rûxiyane.

Rewşa li parêzgehên Sine û Îlamê

Derbarê zererên parêzgeha Sineyê di amarê de hatiye diyarkirin ku ji ber bombebaranan zerer gihîştiye 8 hezar û 407 xaniyan û 135 xanî bi temamî rûxiyane.

Li gorî amara Wezaretê, li parêzgeha Îlamê zerer gihîştiye 6 hezar û 991 xanî û dukanan û 187 xanî bi temamî rûxiyane.

Zererên li Urmiye û Loristanê

Derbarê parêzgeha Urmiyeyê jî di amarê de hatiye gotin ku zerer gihîştiye 5 hezar û 961 xanî û 84 xanî bi temamî rûxiyane.

Her wiha li parêzgeha Loristanê jî di nav wan 33 rojan de zerer gihîştiye 4 hezar û 475 xanî û dukanan û 121 xanî bi temamî rûxiyane.

Şerê Îran û Amerîka-Îsraîlê 28ê Sibata 2026an dest pê kir û heta niha jî didome.

Balafirên şer bi berdewamî êrişî parêzgehên Rojhilatê Kurdistanê dikin.

Heta niha derbarê hejmara mirî û birîndarên sivîl ên li her 5 parêzgehan ti amarên rast nînin.