Hewlêr (Rûdaw) - Raporeke nû ya hikûmeta Amerîkayê radigihîne ku dan û standinên ji bo yekkirina Hêzên Sûriyeya Demokratîk (HSD) a bi artêşa nû ya Sûriyeyê re “gihîştine xitimînê”.
Rapor diyar dike ku rêkeftina radestkirina Bendava Tişrînê “ji ber dilgiraniyên ewlehiyê” nehatiye bicihanîn û vekişîna hêzên Amerîkayê ji hinek deveran bûye sedema zêdebûna aloziyan di navbera Hêzên Sûriyeya Demokratîk (HSD) û eşîrên Ereban ên wan deveran de.
Rapor ji aliyê Mufetîşê Giştî yê Amerîkayê ve hatiye weşandin û behsa kar û çalakiyên çaryeka duyem a îsal a Hevpeymaniya Navneteweyî ya li dijî DAIŞê ya di çarçoveya Operasyona “Pêdegiriya Polayî” de li Îraq û Sûriyeyê dike.
Rapor di demekê de tê ku Amerîkayê bi rakirina cezayên aborî û destpêkirina gavên ji bo asayîkirina pêwendiyan bi hikûmeta nû ya Şamê re di siyaseta xwe ya li hemberî Sûriyeyê de guherînên mezin kiriye.
Li gorî raporê, rewşa HSDyê di mehên Nîsanê heta Hezîranê de gelekî aloz bûye û rûbirûyî gelek guherînên stratejîk bûye.
Di raporê de tê gotin ku di wan sê mehan de, “dan û standinên ji bo yekkirina HSDyê ya bi artêşa nû ya Sûriyeyê re gihîştine xitimînê”.
Ev di demekê de ye ku Fermandarê Giştî yê HSDyê Mezlûm Ebdî û Serokkomarê Sûriyeyê yê qonaxa veguhastinê Ehmed Şer ji bo yekkirina hêz û saziyên Rêveberiya Xweser bi hikûmeta Şamê re 10ê Adara îsal rêkeftinek îmze kiribû.
Her du alî ducare dikin ku heta niha ti pêşketin di rêkeftinê de çênebûne.
Wezareta Karên Derve ya Fransayê ragihand ku biryar e her du alî “di demeke nêzîk de li Parîsê bicivin”.
Mufetîşê Giştî yê Amerîkayê ku pêgeheke hevbeş a mufetîşên Wezareta Parastinê, Wezareta Karên Derve û Ajansa Amerîkayê ya Bipêşxistina Navneteweyî (USAID) ye, di rapora xwe de amaje bi wê yekê dike ku “nakokiyên sereke” yên Şam û Qamişloyê li ser sîstema birêvebirinê û parastina serxwebûn û statuya Rêveberiya Xweser e.
Rapor dibêje: “HSD dixwaze Sûriyeyeke federal hebe û parastina yekparçeyiya pêkhate û cografyaya yekîneyên HSDyê û hêzên wê yên ewlehiyê yên xwecihî bike. Hikûmeta Sûriyeyê jî desthilateke navendî û kontrolkirina hemû hêzên leşkerî dixwaze.”