Nêçîrvan Barzanî sibe diçe Bexdayê

Hewlêr (Rûdaw) - Serokê Herêma Kurdistanê Nêçîrvan Barzanî sibe dê biçe Bexdayê û li gel aliyên Hevpeymaniya Çarçoveya Hevahengiyê bicive.

Nêçîrvan Barzanî wekî Serokê Herêma Kurdistanê û Alîkarê Serokê Partiya Demokrat a Kurdistanê (PDK) dê here Bexdayê.

Dê li ser avakirina hikûmetê biaxivin

Nêçîrvan Barzanî dê li ser avakirina hikûmeta nû ya Îraqê bi aliyên Hevpeymaniya Çarçoveya Hevahengiyê re bicive.

Nêçîrvan Barzanî her wiha dê li ser encamên wan hevdîtinan jî biaxivin ku Elî Zeydî bi aliyên siyasî yên Herêma Kurdistanê re kirine.

Çavê serkirdeyan li vê serdanê ye

Serkirdeyên Îraqê çavê wan li wê yekê ye ku ev serdana Serokê Herêma Kurdistanê dawî li pirsgirêkên di navbera Hewlêr û Bexdayê de bîne.

Tê xwestin ku di kabîneya nû de bi rêya yasa û destûrê çareseriyên mayînde ji bo van pirsgirêkan werin dîtin.

Serdana Elî Zeydî ya Herêma Kurdistanê

Elî Falih Zeydî 27ê Nîsana 2026an ji bo pêkanîna kabîneya nû ya hikûmeta Îraqê hatibû erkdarkirin.

Ji bo ku kabîneya xwe pêk bîne 30 rojên Elî Falih Zeydî hene.

Elî Zeydî 2yê Gulana 2026an ji bo gotûbêjkirina pêkanîna kabîneya nû ya hikûmetê serdana Herêma Kurdistanê kiribû.

Zeydî li Hewlêrê bi Serok Mesûd Barzanî, Nêçîrvan Barzanî û Mesrûr Barzanî re civiyabû.

Piştî van civînan Zeydî serdana Silêmaniyê kiribû û bi Bafil Talebanî, Şaswar Ebdulwahîd, Tevgera Helwest û Komela Îslamî re hevdîtin kiribû.