Hewlêr (Rûdaw) - Dengbêjê navdar ê Kurd Seyîdxanê Boyaxçî îro wefat kir.
Dengbêjê navdar ê Kurd Seyîdxanê Boyaxçî, îro li mala xwe ya li bajarê Ameda Bakurê Kurdistanê wefat kir.
Seydo Şîmşek ku wî 87 sal bû û di nav xelkê de weke Xalê Seyîdxanê Boyaxçî dihat naskirin, ev heyamek e nexweş bû.
Cenazeyê Seyîdxanê Boyaxçî dê li Goristana Yenîkoy a li Rezanê bi xakê bê spartin.
Xalê Seyîdxanê Boyaxçî kî ye?
Dengbêjê navdar ê Kurd Seyîdxanê Boyaxçî sala 1933an li gundê Lexerî yê ser bi Erxeniya Amedê ve jidayîk bû.
Dema Seyîdxanê Boyaxçî 4 salî bû bavê wî wefat kir û ji aliyê mamê xwe ve hat mezinkirin û dibistan ne xwend.
Ew dengbêjê Kurd ji temenê xwe yê 15 saliyê ve li navçeya Sûra Amedê karê boyaxkirina pêlavan kir û bo heyama 25 salan ev kar berdewam kir û herwiha demekê jî di Şaredariya Amedê de weke karmendê paqijkirinê kar kir.
Piştî demek dirêj ji kar û xebatê, Seydo Şîmşek ango Xalê Seyîdxanê Boyaxçî dest bi gotina kilaman kir û li gel bi dehan kilamên wî navî wî di nav xelkê de belav bû.
