Demîrtaş li ser çekdanînê bi wêneyê Sirri Sureyya Onder daxuyanî da

RÛDAW

Hewlêr (Rûdaw) - Hevserokê berê yê HDPyê Selahattîn Demîrtaş piştî merasîma çekdanînê ya PKKyê got, "'Têkçûyê aştiyê nîne,' gotibû Sirri Sureyyayê hêja."

Îro komeke gerîlayên PKKyê li Şikefta Caseneyê çekên xwe danîn.

Di merasîma îmhakirina çekan de ya Koma Aştî û Civaka Demokratîk, Hevseroka Konseya Rêveber a (KCK) Besê Hozat û komeke gerîla cih girt.

Hevserokê berê yê HDPyê Selahattîn Demîrtaşê ku ev 8 sal û nîv e di girtîgehê de ye, piştî merasîma çekdanînê ya PKKyê, li ser medyaya civakî li gel wêneyekî Sirri Sureyya Onder daxuyaniyek belav kir.

Demîrtaş di daxuyaniya xwe de cih da van gotinan:

"'Têkçûyê aştiyê nîne,' gotibû Sirri Sureyyayê hêja.

Belê, îro me berhema yekem a wan hewldanên ku te jî dilê xwe dabûyê, wergirt.

Têkçûyî çênebû, wê çênebe jî. Li ser xêrê be, pîroz be.

Silav û spasiyên min ji bo her kesê ku keda wî tê de heye..."