Serok Barzanî: Yekîtiya Jinan destkefteke girîng a xebata neteweyî ye

Hewlêr (Rûdaw) - Serok Mesûd Barzanî di peyama xwe ya ji bosalvegera damezirandina Yekîtiya Jinan a Kurdistanê ragihand ku Yekîtiya Jinan destkefteke girîng a xebata neteweyî û tevgera rizgarîxwaz a Kurdistanê ye.

Yekîtiya Jinan a Kurdistanê 11ê Kanûna Pêşîn a 1952yan hat damezirandin.

Serok Mesûd Barzanî bi boneya 73yemîn salvegera damezirandina Yekîtiya Jinan a Kurdistanê peyameke pîrozbahiyê belav kir.

Serok Barzanî di peyama xwe de tekez kir ku Yekîtiya Jinan roleke berbiçav û bibandor di bilindkirina asta hişyariyê, parastina mafên jinan û bihêzkirina pêgeha jinên Kurd de lîstiye.

"Rola pêşengiyê dileyîze"

Serok Barzanî di beşeke din a peyama xwe de ji bo Yekîtiya Jinan hêviya serkeftinê xwest û got:

"Ez piştrast im Yekîtiya Jinan a Kurdistanê her wekî qonaxên berê yên xebata xwe, dê di paşerojê de jî di bipêşvebirina doza rewa ya gelê me û berevaniya li maf û daxwazên jinan rola pêşengiyê bilîze."

Peyama Serok Mesûd Barzanî wiha ye:

"Bi navê Xwedayê mezin û dilovan

Birêzan Sekreter û endamên Mekteba Sekreteriya Yekîtiya Jinan a Kurdistanê,

Bi boneya salvegera 73yemîn a damezirandina Yekîtiya Jinan a Kurdistanê, ez pîrozbahiyên germ li we û hemû endamên rêxistina we ya têkoşer û hemû jinên Kurdistanê dikim.

Yekîtiya Jinan a Kurdistanê destkefteke girîng a xebata neteweyî û tevgera rizgarîxwaz a Kurdistanê ye ku roleke berbiçav û bibandor di bilindkirina asta hişyariyê, parastina mafên jinan û bihêzkirina pêgeha jinên Kurd de lîstiye.

Vê rêxistinê bi têkoşîna xwe ya berdewam karîbûye dengê jinên Kurdistanê bigihîne û bibe beşeke girîng a xebata neteweyî û medenî ya gelê Kurdistanê.

Di vê bîranînê de pêzanîna min ji bo xebat û qurbandana jinên Kurdistanê û wî erkî heye ku di qonaxên xebata gelê Kurdistanê de li ser milê wan bûye.

Ez piştrast im Yekîtiya Jinan a Kurdistanê her wekî qonaxên berê yên xebata xwe, dê di paşerojê de jî di bipêşvebirina doza rewa ya gelê me û parastina li maf û daxwazên jinan rola pêşengiyê bilîze.

Ez hêviya serkeftinê ji we re dixwazim."