Li Amedê Foruma Aştiyê: Peyamên Demîrtaş, Mizrakli û Yuksekdagê hatin xwendin
Hewlêr (Rûdaw) - Hevserokên Giştî yên berê yên HDPyê Selahattîn Demîrtaş û Fîgen Yuksekdag û Hevserokê Şaredariya Bajarê Mezin a Amedê yê berê Selçuk Mizrakliyê ji girtîgehên ku tê de ne ji bo "Foruma Azadî û Aştiya Civakî" peyamên xwe şandin.
Wan ji girtîgehên ku tê de ne ji bo "Foruma Azadî û Aştiya Civakî" peyamên xwe şandin.
Foruma Azadî û Aştiya Civakî ji aliyê Şaredariya Bajarê Mezin a Amedê ve tê lidarxistin.
Forum, bi axaftinên destpêkê dest pê kir.
Bernameya vekirinê li Salona Civînan a Alî Emîriyê ya şaredariyê hat kirin.
Hevserokê Giştî yê DEM Partiyê Tuncer Bakirhan jî beşdarî vekirinê bû.
Her wiha gelek mêvan, nûnerên partiyên siyasî û rêxistinên sivîl jî beşdar bûn.
Fîgen Yuksekdag, Selahattîn Demîrtaş û Selçuk Mizrakliyê ku di girtîgehê de ne, ji bo vê forumê peyam şandin.
Peyama Demîrtaş û Mizrakli
Peyama Selahattîn Demîrtaş û Selçuk Mizrakliyê wiha ye:
"Em hêvî dikin ku ev foruma we ya watedar û hêja bi serkeftî derbas bibe.
Em kesên ku keda wan tê de heye pîroz dikin û spasiya wan dikin.
Em bawer in ku ev gotûbêjên hêja dê ji bo derketina ji krîza kûr a siyasî û civakî bibin ronahî.
Her wiha dê ji bo lêgerîna aştiya bi rûmet jî bibin alîkar.
Bi vê baweriyê em silav û hezkirinên xwe yên ji dil ji we hemûyan re dişînin.
Em hêvî dikin ku em di paşerojên azad de bi hev re bin."
Peyama Yuksekdagê
Fîgen Yuksekdagê jî di peyama xwe de spasiya hemû kesên ku di forumê de keda wan heye kir û wiha got:
"Bê guman di vê erdnîgariya siyasî de guherînên mezin çêdibin.
Ev guherînên li herêmê û cîhanê me ber bi wergirtina berpirsyariyan ve dibin.
Her wiha me teşwîq dikin da ku em çareserî û alternatîvan biafirînin.
Hinek hêz rastiya Tirkiye, Kurdistan û herêmê li ser şer, kedxwarî, kuştina jinan û wêrankirina xwezayê ava dikin.
Li hemberî van kesan alternatîva herî mezin gelên me û rêxistinbûna wan a bi hişmendiya demokratîk e.
Dema em dibêjin 'ji bo her kesî bi hev re aştî û azadiya civakî', em armanceke nû jî nîşan didin.
Em dixwazin ji bo herêmê rêyeke nû diyar bikin. Eşkere ye ku pêwîstiyeke mezin bi vî vîn û hewldanê heye.
Ji Tirkiyeyê, ji Amedê, heta Rojava, Filistîn û Îranê gel û jin dixwazin azad bibin.
Yekbûna wan a ji bo aştî û azadiyê dê çarenivîsa serdemê diyar bike. Ev qet xeyaleke dûr nîne.
Ev yek bi qasî taxa me, dibistana me, kargeh û zindana me nêzîkî me ye.
Dibe ku aştî û azadî di hemû qadên jiyanê de bibin nirxên bilind. Ev yek hem mimkin e hem jî pêwîst e.
Ez bawer im ku ev foruma we dê ji bo belavbûna aştiyê alîkariyeke mezin bike.
Aştî, azadî û demokrasî dê ji binî ve, ango ji cihan mezin bibin.
Ez bawer im ku çalakiya we dê Pêvajoya Aştî û Civaka Demokratîk a ku ji aliyê Birêz Ocalan ve hatiye destpêkirin xurt bike.
Ji ber ku pêwîstiyeke mezin bi xebatên bi vî rengî heye.
Bê guman avakirina hêviyê û destpêkên nû ne hêsan e. Lê ezmûnên me yên serkeftinê, rêber û garantiya me ne.
Ez rêz û hezkirinên xwe pêşkêşî we hemûyan dikim û we bi hesret û piştgiriyê silav dikim."