Nêçîrvan Barzanî û Emmanuel Macron li ser êrişa li Mexmûrê axivîn
Hewlêr (Rûdaw) – Serokê Herêma Kurdistanê Nêçîrvan Barzanî û Serokkomarê Fransayê Emmanuel Macron ser êrişa Mexmûrê axivîn ku tê de leşkerekî Fransayê hatibû kuştin.
Serokê Herêma Kurdistanê Nêçîrvan Barzanî û Serokkomarê Fransayê Emmanuel Macron bi rêya telefonê axivîn.
Nêçîrvan Barzanî êrişa ku li Mexmûrê li dijî baregeheke hevbeş a Pêşmerge û hêzên Fransayê yên di çarçoveya Koalîsyona Navneteweyî de pêk hatibû bi tundî şermezar kir.
Şeva borî komên çekdar êrişî Eniya 6an a Pêşmergeyan a li Mexmûrê kiribû û di encamê de leşkerekî payebilind ê Fransayê canê xwe ji dest dabû û 6 leşkerên din jî birîndar bûbûn.
Serokatiya Herêma Kurdistanê eşkere kir ku axaftina telefonî îro pêk hatiye.
Nêçîrvan Barzanî ji ber leşkerê Fransayî yê ku hatiye kuştin sersaxî da Serokkomarê Fransayê û malbata wî leşkerî.
Nêçîrvan Barzanî diyar kir ku wî leşkerî ji bo parastina asayîşê û têkoşîna li dijî terorê li Herêma Kurdistanê canê xwe feda kiriye.
"Divê hikûmeta Îraqê komên çekdar ceza bike"
Serokê Herêma Kurdistanê ji ber piştgiriya Fransayê ya ji bo Îraq û Herêma Kurdistanê spasiya Macron kir.
Nêçîrvan Barzanî amaje bi wê yekê kir ku pêwîst e hikûmeta Îraqê erkê xwe pêk bîne û rê li ber êrişên van komên çekdar bigire.
Nêçîrvan Barzanî destnîşan kir ku divê ew komên çekdar werin cezakirin da ku berjewendiyên welêt û pêwendiyên bi civaka navneteweyî re nekevin metirsiyê.
Li gorî daxuyaniya Serokatiya Herêma Kurdistanê, Macron jî ji ber hevxemiya Nêçîrvan Barzanî û gelê Kurdistanê spasiya wî kiriye.
Macron daye zanîn ku piştgiriya Fransayê ya ji bo Îraq û Herêma Kurdistanê didome.
Aloziyên li herêmê
Nêçîrvan Barzanî û Emmanuel Macron di axaftina xwe de mijara rûdanên dawî yên şer û bandorên wê yên li ser herêmê jî gotûbêj kirin.
Li gorî daxuyaniyê, di axaftinê de hatiye xwestin ku ji bo rawestandina şer û çareserkirina pirsgirêkan bi awayekî aştiyane hewl bên zêdekirin.