Malbateke ji Şingalê li Geliyê Elî Beg xeniqî

RÛDAW

Hewlêr (Rûdaw) - Endamên malbateke ji Şingalê ku îro bi mebesta geştê çûbûn devera Geliyê Elî Beg, dema ku melevanî dikirin, xeniqîn. Termê dayikê hatiye dîtin û bav û zarok winda ne.

Bûyer li nêzikî Kanî Maran a li Geliyê Elî Beg qewimî. Malbateke sê kesî di sêyem roja Cejna Remezanê de ji bo geştê çûbûn wê deverê û ji ber hewayê germ xwestin bikevin avê.

Lê li gor zanyariyan endamên wê malbatê, nekarîn ji avê derkevin û xeniqîn. Rêveberê Berevaniya Şaristanî ya Soranê Yunis Qadir ji Rûdawê re ragihand ku tîmên wan termê jinê derxistine ku navê wê Texrîd Ziyad e û temenê wê 22 sal e.

Rêveberê Berevaniya Şaristanî ya Soranê diyar kir, “Li gor zanyariyên me ew malbat xelkê Şingalê û rûniştvanên Behirkê bûye. Ji bo geştê hatibûn Geliyê Elî Beg.”

Yunis Qadir herwiha ragihand ku xebatên wan ên ji bo dîtina cenazeyên zarok û bavê wî berdewam in û “cenazeyê jinê jî ji bo Pizîşkiya Dadê hatiye şandin.”