Serok Barzanî: Berpirsyariya vê tawanê li ser milê Dewleta Îraqê ye

RÛDAW

Hewlêr (Rûdaw) - Serok Mesûd Barzanî ji bo 37emîn salvegera kîmyabarankirina Helebceyê got, "Berpirsyariya vê tawana li dijî mirovahiyê û encam û şopên wê, heya qerebûkirina malbatên qurbaniyan, li ser milê dewleta Îraqê ye."

16ê Adara 1988an, hikûmeta wê demê ya Îraqê bi çekên kîmyawî êrişî Helebceyê kir.

Bi wê sedemê herî kêm 5 hezar welatî şehîd bûn, beşek ji xelkê jî ji ber bandora çekên kîmyawî rastî nexweşiyên curbicur hatin û heta niha jî şopa nexweşiyan li ser wan maye.

Serok Mesûd Barzanî di 37emîn salvegera kîmyabarankirina Helebceyê de peyamek belav kir.

Serok Mesûd Barzanî di peyama xwe de wiha got:

"Birîn û êşa sûcê kîmyabarankirina Helebceyê heta hetayê di hundirê dil û giyanê hemû Kurdistaniyan de dimîne û nayê jibîrkirin.

Berpirsyariya vê tawana li dijî mirovahiyê û encam û şopên wê, heya qerebûkirina malbatên qurbaniyan, li ser milê Dewleta Îraqê ye.

Di 37 saliya karesata bombebarankirina Helebceyê bi çekên kîmyawî de, silav ji bo giyanê pak ê şehîdên Helebceyê û malbat û kesûkarên şehîd û birîndarên wê tawanê re dişînin."