Hewlêr (Rûdaw) - Serok Mesûd Barzanî Cejna Newrozê û sala nû ya Kurdî pîroz kir û got, "Newroz ji bo gelê Kurdistanê, bihar û nûbûn û ronahî û azadî ye."
Serok Mesûd Barzanî ji bo Cejna Newrozê û sala nû ya Kurdî peyameke pîrozbahiyê belav kir.
Serok Mesûd Barzanî peyama pîrozbahiyê ya xwe arasteyî malbatên "serbiland ên şehîdan, Pêşmergeyên qehreman û hemû çîn û tebeqeyên gelê Kurdistanê" kir.
Serok Barzanî her wiha pîrozbahî li wan hemwelatiyên ku li "parçeyên din ên Kurdistanê ne" û hemû ew neteweyên ku Newroz beşek e ji dîrok û çanda wan, kir.
Serok Barzanî "bi germî" pîrozbahî li diasporaya Kurdî û ew milyonan Kurdên ku "bi hesteke bilind dûrî axa welatê xwe cejna Newrozê bilind digirin û nirxên Newrozê li hemû cîhanê belav dikin" kir.
Di beşeke din a peyama xwe de Serok Barzanî piştgirî da pêvjoya aştiyê ya li Tirkiye û Bakurê Kurdistanê û got, " em piştgiriya pêvajoya aştî û çareseriyê li Tirkiyeyê dikin û aştiyê wekî tenê rêya rast û durist a derbasbûna pirsgirêkan dizanin."
Serok Mesûd Barzanî di peyama xwe de wiha got:
"Newroz ji bo gelê Kurdistanê, bihar û nûbûn û ronahî û azadî ye.
Newroz wateya jiyaneke nû û mizgîniya serkeftina ronahiyê li ser tarîtî û stemê dide.
Bi hilkefta hatina cejna neteweyî ya Newrozê ez pîrozbahiyê li malbatên serbiland ên şehîdan û pêşmergeyên qehreman û hemû çîn û tebeqeyên gelê Kurdistanê dikim.
Pîrozbahiya Newrozê li hemû zarokên gelê Kurd li parçeyên din ên Kurdistanê dikim.
Pîrozbahiyê li hemû wan neteweyan dikim ku Newroz beşek e ji dîrok û çand û kevneşopiya wan.
Li vir dixwazim bi germî pîrozbahiya Newrozê li diasporaya Kurdî û li wan milyonan Kurdên ku bi hesteke bilind dûrî axa welatê xwe cejna Newrozê bilind digirin û nirxên Newrozê li hemû cîhanê belav dikin, bikim.
Ji wan re dibêjim ku hûn tim di hizir û wijdana me de ne û xweşî û cejnên we dirêjkirina xweşî û cejnên me ne.
Cihê şanaziyê ye ku dibînin dest di nav destê hev de û bi yekdilî di Newrozê de alaya azadî û şanaziyê bilind dikin.
Gelekî kêfxweş im ku li bajarê Kolnê yê Almanyayê di merasîmeke mezin de hezkirina xwe û soza xwe ji bo welatê xwe dubare dikin, hûn deng û rengê gelê xwe ne û ez spasiya we dikim.
Di cejna neteweyî ya Newrozê de bi şanazî tekeziyê li çanda pevjiyanê û peyama aştîxwazane ya gelê Kurdistanê dikin.
Her ji ber wê yekê ve em piştgiriya pêvajoya aştî û çareseriyê li Tirkiyeyê dikin û aştiyê wekî tenê rêya rast û durist a derbasbûna pirsgirêkan dizanin.
Her di vê hilkeftê de em bi wê hêviyê ne ku dawî li êş û azarên gelê Kurd li Sûriyeyê were û Kurd bi helwesteke hevbeş û bi rêbaza aştiyane li gel aliyên din ên Sûriyeyê bigihîjin encamekê ku di xizmeta hemû aliyan de be.
Hêvîdar im Newroza îsal bibe destpêkek ji bo rihetî û xweşiyê ji bo hemû gelê Kurdistanê û Îraqê û ew Newroz û hemû cejnên wan di bextiyarî û kameraniyê de derbas bikin.
Hêviya wê dixwazim ku gelên herêmê bikaribin di bin siya aramî û seqamgîriyê di rewşeke aştiyane û biratiyê de bijîn.
Newroza we pîroz be û bîminin di nav xêr û xweşiyê de."
