Hewlêr (Rûdaw) - Hevpeymaniya Çarçoveya Hevahengiyê ya Şîeyan, ji bo diyarkirina serokwezîrê nû, îşev li ofîsa Serokê Tevgera Hîkmetê ya Îraqê Emar Hekîm dicive.
Li gorî agahiyan, ev civîn ji bo diyarkirina pirsa namzedê serokwezîrtiyê taybet hatiye kirin.
Pêşbaziya sereke: Sûdanî û Malikî
Rikaberî di navbera du baskên sereke yên Şîeyan de ye:
Muhemed Şiya Sûdanî: Serokê Hevpeymaniya Avakirin û Bipêşketinê.
Nûrî Malikî: Serokê Hevpeymaniya Dewleta Yasayê.
Gotibêjê Encumena Bilind a Îslamî ya Îraqê Elî Dîfaî ji Rûdawê re got,"Di nava Çarçoveya Hevahengiyê de nêrîn ew e ku namzed bi lihevkirinê were diyarkirin lê eger lihevkirin çênebe, dê bi piraniya du li ser sêyan (2/3) ya endamên hevpeymaniyê were diyarkirin."
"Namzedê me Sûdanî ye"
Di heman demê de, lîderê Hevpeymaniya Avakirin û Pêşketinê Muhemed Xalidî ji Rûdawê re got:
"Muhemed Şiya Sûdanî namzedê me ye; em ne cîgirekî û ne jî namzedekî lihevhatinê qebûl dikin."
Li gorî Xalidî, ji 12 aliyên ku di nava Çarçoveya Hevahengiyê de ne, 8 alî piştgiriyê didin ku Sûdanî careke din bibe serokwezîr lê ew li bendê ne ku bi "lihevkirinê" vê yekê çareser bikin.
Namzedê din: Basim Bedrî
Li gorî Elî Dîfaî, rikaberî di navbera Muhemed Şiya Sûdanî û Basim Bedrî de tê meşandin.
Basim Bedrî Serokê Desteya Lêpirsîn û Dadweriyê ya Îraqê ye û wekî Alîkarê Nûrî Malikî ji bo postê serokwezîrtiyê tê dîtin.
Çarçoveya Hevahengiyê ku ji 12 aliyên Şîe pêk tê, bi zêdetirî 180 endaman mezintirîn fraksiyona parlamentoyê ye.
Li gorî destûra Îraqê, divê di nava 15 rojan de piştî hilbijartina serokkomar, namzedê serokwezîrtiyê ji bo pêkanîna hikûmetê were erkdarkirin.
Niha ji bo Şîeyan tenê 6 roj mane ku namzedê xwe diyar bikin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse