Kurdên li her çar parçeyên Kurdistanê û Ewropayê Cejna Newrozê bi coş pîroz kir

RÛDAW

Hewlêr (Rûdaw) - Ji ber rewşa herêmê, li Herêma Kurdistanê ji bo pîrozkirina Cejna Newrozê merasîmên fermî nehatin lidarxistin.

Lê belê gelek Kurdan ji bo cejna neteweyî ya gelê Kurd amadekariya xwe kir.

Bi vî awayî li bajar û deverên cihêreng ên her çar parçeyên Kurdistanê û derveyî welêt agirê Newrozê hat pêxistin.

Pêxistina agirê Newrozê li ser Kelha Hewlêrê

Bi amadebûna Serok Mesûd Barzanî û Serokwezîrê Herêma Kurdistanê Mesrûr Barzanî, li ser Kelha Hewlêrê merasîma pêxistina agirê Newrozê hat lidarxistin.

Serokwezîrê Herêma Kurdistanê di axaftina xwe de Cejna Remezanê û Newrozê li Serok Mesûd Barzanî û xelkê Kurdistanê pîroz kir.

Mesrûr Barzanî got, "Em Cejna Remezanê û Newrozê li rêber û serokê me yê mezin cenabê Serok Barzanî, pêşmerge, malbatên serbilind ên şehîdan û hemû xelkê Kurdistanê pîroz dikin."

Mesrûr Barzanî bal kişand ser dîroka Kurdan û wiha axivî:

"Xelkê Kurdistanê di dirêjiya dîrokê de li beramberî zalim û zordaran rawestiyaye.

Wan ti caran serê xwe netewandiye. Niha jî hêviya me ew e ku di bin sîbera Serok Barzanî û bi rêbertiya wî de, gelê serbilind ê Kurdistanê her bi ser dikeve û li beramberî hemû zordaran raweste."

Serokwezîr her wiha got, "Em hêvî dikin asoya gelê me di bin serkirdatiya Serok Barzanî de ronîtir bibe.

Ev yek dê bi hêz û milê pêşmergeyên qehreman û xweragiriya gelê me çêbibe."

Mesrûr Barzanî spasiya fedakriyên xelkê Kurdistanê kir û wiha domand:

"Em gelekî spasiya xweragiriya xelkê Kurdistanê dikin. Bi taybetî di vê dema ku em dibînin şer û alozî li herêma me hene de.

Em bi hemû şiyana xwe hewl didin ku Kurdistanê ji hemû şer û aloziyan biparêzin û dûr bixin. Ez bawer im em ê bi piştgiriya Xwedayê mezin ber bi asoyeke ronîtir ve gav bavêjin."

Welatî û geştyar çûn Akrê

Li Akrêyê bi sedan ciwanan xetîrên agir birin ser çiyê.

Wan dîmenekî balkêş da "Paytexta Newroza Kurdistanê".

Kesên ku ji bajarên din çûbûn Akrê got, "Rewşa nearam vîna gelê Kurd têk nabe."

Qaymeqamê Navçeya Akrê Dilawer Bozo ji Rûdawê re axivî.

Dilawer Bozo got, "Ji ber rewşa ewlehiyê û ji bo parastina welatî û geştyaran, me ragihandibû ku em merasîmên fermî nakin.

Lê belê ji bo Newrozê gelek kes hatin Akrê."

Qaymeqamê Akrê her wiha got, "Xelk bi xwe hat. Wan dahol û zirne anîbûn û govend gerandin.

Me jî agirê Newrozê pê xist."

Peyama Kurdayetiyê li Dhok, Silêmanî, Helebce û Germiyanê

Li parêzgeha Dihokê, ji xeynî çend cihên parêzgehê, bi bilindkirina Alaya Kurdistanê merasîma Newrozê bi awayekî girseyî hat lidarxistin.

Li Silêmaniyê jî bi lidarxistina merasîmên çandî, govend û çalakiyên cihêreng agirê Newrozê hat pêxistin.

Parêzgarê Silêmaniyê Heval Ebûbekir ji Rûdawê re axivî.

Heval Ebûbekir got, "Ji ber rewşa herêmê Newroz bi awayekî fermî nayê pîrozkirin.

Lê welatî azad in ku agir pêxin. Pêwîst e qerebalixiyeke zêde çênebe û rênima wekî xwe werin cîbicîkirin."

Li çendîn cihên parêzgeha Helebceyê jî agirê Newrozê hat pêxistin.

Yek ji wan cihan jî Kelha Xurmalê bû.

Nûçegihana Rûdawê Sazgar Selaheyê got, "Îro cara yekem e ku li ser Kelha Gulemberê ya li Xurmalê agirê Newrozê tê pêxistin."

Yek ji serpereştyarên merasîmê ji Rûdawê re eşkere kir ku ji xeynî pêxistina agir, ew dê alayeke mezin bilind bikin.

Pîvana alayê 6 bi 4 metre ye û ew dê di bilindahiya 22 metreyan de were daliqandin.

Li Kelarê jî welatî li Kela Şêrwaneyê kom bûn.

Keçeke Kurd a ji Kobaniyê ya Rojavayê Kurdistanê,ku 10 sal in li Kelarê dijî, ji Rûdawê re axivî.

Wê got, "Newroz cejna her Kurdekî ye. Em li vir jî peyama rizgariyê ducare dikin."

Cara yekem li ser Pira Bilind a Soranê ya li parêzgeha Hewlêrê jî merasîma Newrozê hat lidarxistin.

Serpereştyarê Îdareya Soranê Helgurd Şêx Necîb ji Rûdawê re got, "Me dixwest bernameyeke mezin hebe.

Lê ji ber rewşa herêmê me tenê merasîma pêxistina agir encam da."

Kerkûk: Bîranîna raperîn û azadiyê

Cejna Newrozê û Remezanê li Kerkûkê hevdem bû li gel salvegera azadkirina bajar a sala 1991ê.

Welatî bi Alaya Kurdistanê çûn ser Kelha Kerkûkê.

Parêzgarê Kerkûkê Rêbwar Taha ji nûçegihanê Rûdawê Herdî Mihemed re axivî.

Rêbwar Taha destnîşan kir ku 3 boneyên cuda di heman rojê de li Kerkûkê bi rê ve diçin. Wî got, "Pêkhateyên cihêreng li bajar hene. Ol û mezhebên cuda di nava bajar de hene."

Rêbwar Taha herwiha got, "Em dikarin vê cudahiya di pêkhate, ol û mezheban de bikin hêzekê.

Em dikarin wê hêzê jî bixin xizmeta xelkê Kerkûkê. Ev yek jî vîna îdareya nû ya Kerkûkê ye."

Parêzgarê Kerkûkê bangî hemû ciwan û xelkê Kerkûkê kir.

Rêbwar Taha got, "Ez daxwaz dikim ku em wê bihevreyiyana li Kerkûkê pêk hatiye, biparêzin û bihêztir bikin.

Biryara partiyên Kurdistanî ew bû ku ji ber vê rewşê kombûn neyên kirin.

Lê belê biryareke din jî hebû. Partiyên Kurdistanî bi hevahengiya li gel me biryar da ku divê em agirê Newrozê pêxin.

Agirê Newrozê ne taybetî kesekî ye. Ew taybetî gelekî ye û divê her were pêxistin."

Amadekariyên ji bo Newroza Amedê û peyama Nêçîrvan Barzanî

Şahiyên Newrozê li Bakurê Kurdistanê ji 9ê vê mehê ve dest pê kiriye û dê heta 24ê mehê bidomin.

Lê belê şahiya herî sereke dê îro li Amedê bê kirin.

Ji bo Newroza îsal gelek mêvan ji derveyî welêt hatine vexwendin.

Di nava wan de şandeyên ji Herêma Kurdistanê, Îraq, Fransa, Almanya, Swêd, Herêma Katalonyaya Spanyayê, Misir û Hindistanê hene.

Serokê Herêma Kurdistanê Nêçîrvan Barzanî bi awayekî fermî ji bo şahiya Newroza Amedê hatibû vexwendin.

Berdevkê Serokatiya Herêma Kurdistanê Dilşad Şehab li Amedê ji nûçegihanê Rûdawê Maşallah Dekak re axivî.

Dilşad Şehab da zanîn ku ji ber rewşa Îraqê û herêmê Nêçîrvan Barzanî beşdarî şahiyê nabe.

Dilşad Şehab dê îro peyama Serokê Herêma Kurdistanê Nêçîrvan Barzanî bixwîne.

Şehab got, "Înşele em dê di şahiya Newrozê de peyama cenabê Serokê Herêma Kurdistanê bixwînin."

Newroza Amedê rûdaneke gelekî girîng e û di dilê her Kurdekî de xwedî pêgeheke taybet e.

Newroz ji bo me cejneke neteweyî ye. Lê belê di heman demê de ji bo gelên herêmê jî xala hevpar a bihevreyiyanê ye."

Newroz li Rojava û Rojhilatê Kurdistanê

Bi hezaran welatî li bajar, navçe û gundên Rojavayê Kurdistanê beşdarî şahiyên Newrozê bûn.

Yek ji şahiyên herî mezin li bajarê Qamişloyê bû.

Di wê şahiyê de welatî cilên neteweyî li xwe kirin.

Wan bi gerandina govendê Cejna Newrozê pêşwazî kir.

Nûçegihana Rûdawê ya Qamişloyê Vîviyan Fetahayê got, biryar e 24ê Adarê li stadyuma Qamişloyê şahiyeke mezin a Cejna Newrozê were lidarxistin.

Vîviyan Fetahayê diyar kir ku her çend biryar bû şahî di roja yekem a Newrozê de were kirin jî lê guhertin çêbû.

Rêkxeran ji bo ku beşdariyeke berfireh hebe, şahî paşxist 24ê Adarê.

Welatiyekî ji nûçegihana Rûdawê re ragihand ku ew hêvîdar e Kurdên li Rojavayê Kurdistanê û Sûriyeyê bibin yek.

Ji ber ku belavbûn dibe sedema lawazbûna Kurdan.

Welatiyên li Efrînê jî bi awayekî çalak beşdarî şahiyên Newrozê bûn.

Ji ber şerê Îsraîl û Amerîkayê yê li gel Îranê, li bajar û navçeyên Rojhilatê Kurdistanê şahiya Newrozê nehate kirin.

 Lê belê welatiyan li gundan agirê Newrozê pêxist.

Şahiya Bonnê bi beşdariya bi dehan hezar welatiyan tê lidarxistin

Divê were got îro li bajarê Bonnê yê Almanyayê şahiya Newrozê were lidarxistin.

Tê pêşbînîkirin ku nêzîkî 50 hezar rûniştvanên welatên Ewropayê tê de amade bin.

Çend hunermendên navdar ên Kurd ên wekî Şivan Perwer, Hozan Dîno, Hanî û Hesen Şerîf dê beşdarî şahiyê bibin.

Tîma Tora Medyayî ya Rûdawê ji bo weşana şahiyê li Bonnê ye.

Pêşkêşkarê Rûdawê Dilbixwîn Dara, li parka ku şahî lê were kirin bi hunermendan re axivî.

Di bernameyê de Serpereştyara Konfederasyona Revenda Kurdistanî Şîfa Barzanî û gelek siyasetmedar û kesayetên her çar parçeyên Kurdistanê jî amade bûn.

Hunermend û kesayetan di panêla Rûdawê de qala giringiya Newrozê, rewşa Kurdan û rola Kurdên dîasporayê yên di Pirsgirêka Kurdan de kirin.

Şivan Perwer got, ew rewşa ku gelê Kurd tê re derbas bûye, yek ji wan sedeman e ku wî hunera xwe xistiye xizmeta gelê Kurdistanê.

Serpereştyara Konfederasyona Revenda Kurdistanî Şîfa Barzanî bal kişand ser kar û amadekariyên Newroza Bonnê.

Şîfa Barzanî got, "Ez spasiya komîteya amadekar a vê şahiya pîroz a Newrozê dikim.

Ez bi taybetî spasiya Kak Akîf, Kak Îsmaîl, Faris û gelek birayên din dikim ku min navê wan neanîn ziman.

Ew sê meh in mijûlî vî karî ne û gelekî westiyane. Wan bi dehan civîn û çûn û hatin kirine da ku em karibin Newrozeke bi coş pîroz bikin."

Şîfa Barzanî diyar kir ku dê Kurdên her çar parçeyên Kurdistanê beşdarî Newroza Bonnê bibin û got:

"Em gelekî kêfxweş in gava em dibînin ku li vir tenê Alaya Kurdistanê li ba dibe.

Daxwaza me ji xelkê me ew e ku bi coş û kelecaneke mezin werin Bonnê.

Bila ew li vê qadê Alaya Kurdistanê bilind bikin."