Balyozê Çînê Şaredariya Amedê ziyaret kir

RÛDAW

Hewlêr (Rûdaw) - Balyozê Çînê yê li Enqereyê Jiang Xuebin û şandeya pê re çûn Şaredariya Bajarê Mezin a Amedê.

Şandeyê bi hevserokên şaredariyê re hevdîtinek kir.

Di civînê de bipêşxistina pêwendiyên dîplomatîk û çandî yên di navbera her du aliyan de hat nirxandin.

Hevserokên Şaredariya Amedê bal kişand ser potansiyela bajêr a di warên geştyarî, çandinî û teknolojiyê de.

Şandeya Çînê hat pêşwazîkirin

Şaredariya Bajarê Mezin a Amedê li ser hesabê xwe yê medyaya civakî derbarê mijarê daxuyaniyek belav kir.

Li gorî daxuyaniyê, Balyozê Komara Gel a Çînê yê li Enqereyê Jiang Xuebin û şandeya pê re îro çûne serdana şaredariyê.

Hevserokên Şaredariyê Serra Bucak û Dogan Hatun li avahiya şaredariyê şandeya Çînê pêşwazî kir.

Daxwaza projeyên hevbeş

Di hevdîtinê de pêwendiyên dîplomatîk û çandî yên di navbera Çîn û Tirkiye û Bakurê Kurdistanê de hatin nirxandin.

Ev pêwendî di asta birêvebiriyên xwecihî de hatin gotûbêjkirin.

Hevserokan bal kişand ser potansiyela Amedê ya di warê geştyarî, çandinî û teknolojiyê de û wan daxwaza xwe ya ji bo xurtkirina pêwendiyan anî zimên.

Her du aliyan amadebûna xwe ya ji bo parvekirina ezmûnan û pêkanîna projeyên hevbeş nîşan da.

Hat destnîşankirin ku dê di dema bê de pêwendiyên her du aliyan li ser asta şaredariyan berdewam bikin.