Hewlêr (Rûdaw) – Hevserokê KONGRA - GELê Remzî Kartal bernameyekê televîzyonê de ragihand ku nameya Rêberê PKKyê Abdullah Ocalan gihiştiye destê wan.
Berdevka DEM Partiyê Ayşegûl Dogan 17ê Sibatê diyar kiribû ku nameyên Ocalan gihiştime berpirsên Qendîlê, Ewropa û Bakur û Rojhilatê Sûriyeyê.
Remzî Kartal di Medya Haberê de behsa nameya Abdullah Ocalan kir û diyar kir ku ew name gihiştiye destê wan.
Kartal diyar kir ku rêya pêvajoyê derketiyê holê û got:
"Şer xwedî rêzik e. Rewşa têkbirina û qedandinê ne li holê ye. Helwesteke lihevhatinê, rêkeftinê û vekirina rêya pêvajoyeke demokratîk heye.
Rêber Apo (Ocalan) dixwaze derfeteke mezin ji Tirkiyeyê re çêbike. Li ser vê bingehê biryarên dîrokî distîne. Di pêvajoyeke wiha de haziriya bangekê dike.”
“Nameya Ocalan gihişt destê me”
Hevserokê KONGRA - GEL behsa nameya Ocalan jî kir û wiha domand:
“Rêber Apo ji her derê re nameyan dişîne. Ji vir ve ez dixwazim vê jî bibêjim.
Ev name ne tenê ji bo wan aliyên Kurd ên ku hevdîtin pê re dikin, tevgera me û Ewropayê re ne.
Ji destpêkê heta niha, li çarçoveya daxwaza Rêber Apo, nameya wî gihiştiye hemû aliyên têkildar ên ku şande bi wan re civiyaye.
Divê ev were zanîn. Ev ne tenê gotineke devkî ye. Ev şêwaza xebatê û cidiyeta Rêber Apo ye.
Ji ber ku girîngiya her gotinekê dizane, ew dixwaze ku daxuyaniyên xwe yên rasterast bên ragihandin.
Ev gelekî girîng e. Erê, civîn û danûstandin bi heyetê re hene lê bi rastî jî nameyên wî yên rasterast ji aliyên têkildar re hatine şandin.
Di vê çarçoveyê de nameyeke wî ya nivîskî ji bo Ewropa û rêxistinên Ewropayê jî hat û gihişt.
Tiştê ku Serok Apo di nameyên xwe de dibêje, bi taybetî di nameyên ji rêxistina xwe re, kuraniya wan mijaran e ku heta niha di civînan de bi heyetê re parve kirine.
Di dema berê de tevgera têkoşînê, ango PKK, her tim xwest rê û rêbazên xwe yên têkoşînê biguherîne û bi pêş bixe.
Ji vî aliyî ve ji bo pêkanîna guherînên stratejîk û guherînên bingehîn ên rêxistinî jî gelek hewlên wî çêbûn.
"Ev biryara rêxistinê ye"
Rêxistina me, tevgera me li ser vê mijarê helwest nîşan da. Ji destpêkê ve em bi tevahî piştgiriyê didin pêvajoya ku Serok Apo bi pêş dixe û em wekî tevger û rêxistin bi biryar in ku em di hemû qadên jiyanê de erkên xwe pêk bînin.
Ev biryara rêxistinê ye. Ji ber vê ev bi rastî jî pêvajoyeke dîrokî ye; bi taybetî ji bo Tirkiyeyê."
