Hêzên Rojhilatê Kurdistanê êrişên li Herêma Kurdistanê şermezar kirin

Hewlêr (Rûdaw) - Hevpeymaniya Hêzên Siyasî yên Kurdistana Îranê (Rojhilatê Kurdistanê) êrişa mûşekî ya Îranê ya li hêzên Pêşmergeyan şermezar kir.

Hevpeymaniyê bangî welatên hevpeyman û civaka navneteweyî kir ku li hemberî binpêkirina serweriya Herêma Kurdistanê bertekeke bilez nîşan bidin.

Banga lezgîn ji bo civaka navneteweyî

Hevpeymaniya Hêzên Siyasî yên Rojhilatê Kurdistanê derbarê êrişa vê sibehê ya li hêzên Pêşmergeyan daxuyaniyek belav kir.

Êriş li Îdareya Serbixwe ya Soranê ya parêzgeha Hewlêrê ve hatibû kirin.

Di daxuyaniyê de amaje bi şehîdketina 6 Pêşmergeyan û birîndarbûna 30 Pêşmergeyên din hat kirin ku Wezareta Pêşmergeyan jî vê sibehê ev yek ragihandibû.

Hevpeymaniyê sersaxî da malbatên şehîdan, xelkê Herêma Kurdistanê, Wezareta Pêşmergeyan û Hikûmeta Herêma Kurdistanê.

Hevpeymaniyê her wiha êrişên Komara Îslamî ya Îranê û hêzên nêzîkî wê yên li ser Herêma Kurdistanê şermezar kirin.

"Êriş ji 28ê Sibatê ve didomin"

Hevpeymaniya Hêzên Siyasî yên Kurdistana Îranê (Rojhilatê Kurdistanê di beşeke din a daxuyaniyê de got:

"Êrişên mûşekî û dronî yên Supaya Pasdaran ên li baregehên partiyên Rojhilatê Kurdistanê û navendên leşkerî û sivîl ên Herêma Kurdistanê ji roja yekem a şer, anku ji 28ê Sibatê ve didomin."

Hevpeymaniyê bangî welatên hevpeyman û civaka navneteweyî kir ku li hemberî êrişên Îranê bisekinin.

Hevpeymaniyê her wiha xwest ku ew li hemberî binpêkirina serweriya siyasî ya Herêma Kurdistanê xwedî helwest û bertekên bilez bin.

Hevpeymaniya Hêzên Siyasî yên Kurdistana Îranê 22yê Sibata 2026an ji aliyê pênc hêzên Rojhilatê Kurdistanê ve hat damezirandin.

Ew hêzên siyasî ev in: Partiya Jiyana Azad a Kurdistanê (PJAK), Partiya Demokrat a Kurdistana Îranê (PDKÎ), Komeleya Zehmetkêşên Kurdistanê, Saziya Xebat a Kurdistana Îranê û Partiya Azadiya Kurdistanê (PAK).