Alîkariya mirovî ya Neteweyên Yekbûyî gihişt Kobaniyê

Hewlêr (Rûdaw) - Alîkariya mirovî ya Neteweyên Yekbûyî gihişt bajarê Kobaniyê yê Rojavayê Kurdistanê.

Alîkariya mirovî ya Neteweyên Yekbûyî ji parêzgeha Helebê gihişt Kobaniyê û hat zanîn ku ew alîkarî ji 24 barhilgiran pêk tê.

Alîkariya ku li bendê bûn gihişt bajarê Kobaniyê yê Rojavayê Kurdistanê ku di bin dorpêçeke giran de ye û krîza mirovî lê kûr bûye.

Karwanê alîkariya mirovî yê ku ji aliyê Neteweyên Yekbûyî ve hatiye organîzekirin û ji 24 barhilgiran pêk tê, ji parêzgeha Helebê bi rê ket û kete nav bajêr.

Gava yekem a şênber a piştgiriyê

Ev sewqiyata ku ji bo xelkê herêmê xwedî girîngiyeke jiyanî ye, piştî mirina zarokan û rîska birçîbûnê ya li bajêr bû gava yekem a şênber a piştgiriyê.

Xelkê herêmê bi rojan e ji bo peydakirina xwarinên bingehîn, derman û sotemeniyê rastî zehmetiyên mezin dihat.