Li Şingalê mijara çekan: Biryar demkî hat rawestandin

Hewlêr (Rûdaw) - Hikûmeta Îraqê di çarçoveya plana "sînordarkirina çekan a di destê sivîlan de", li navçeya Şingalê û nahiyeya Giruzêrê dest bi rêkarên nû kir.

Parlamenter Xalid Seîdo ragihand ku bicihanîna biryarê ji bo demeke kurt hatiye rawestandin.

Hikûmeta Îraqê dixwaze welatî çekên giran radest bikin û çekên sivik ên di destê xwe de jî tomar bikin.

Parlamenterê Kotaya Kurdên Êzidî yê Parlamentoya Îraqê Xalid Seîdo ji Rûdawê re ragihand ku li gorî biryara Artêşa Îraqê û rayedarên payebilind, plana li herêmê li ser du xalên sereke hatiye avakirin:

- Pêwîst e ku çekên giran bi temamî radestî saziyên fermî yên dewletê werin kirin.

- Welatî dikarin çekên xwe yên sivik (demançe û kalaşnîkov) biparêzin, bi mercê ku li navendên pêwendîdar bên tomarkirin.

“Çek ji bo xweparastinê ne”

Xalid Seîdo eşkere kir ku ew bi rayedarên Bexdayê re di nav pêwendiyan de ne da ku "çareseriyeke zanistî û guncaw" ji bo vê mijarê were dîtin.

Seîdo bal kişand ser nîgeraniyên xelkê Şingalê û bi bîr anî ku ji ber ezmûna tal a êrişên DAIŞê yên sala 2014an, welatî van çekan wekî amûreke "xweparastinê" û "parastina axa Îraqê" dibînin.

Seîdo destnîşan kir ku çekên di destê xelkê de li ser saziyên dewletê ne gef in û got:

"Em li gel wê yekê ne ku ev pirsgirêk bi rêyên guncaw were çareserkirin."

Biryar demkî hat rawestandin

Parlamenterê Kurd diyar kir ku piştî dan û standinên di navbera wan û aliyên ewlehiyê de, bicihanîna vê biryarê ji bo demeke kurt hatiye rawestandin.

Her çend hikûmeta navendî li ser komkirina çekên giran bi israr be jî, nûnerên herêmê didin xuyakirin ku ji bo tomarkirina çekên sivik amadehiya hevkarî û hêsankariyê heye.

Armanc ew e ku bi rêya diyalogê, hem serweriya qanûnê li seranserî Îraqê were çespandin, hem jî taybetmendî û nîgeraniyên ewlehiyê yên welatiyên Şingalê werin parastin.