Li ser sînor mûcîzeya xwezayê: Kaniya Spî piştî 7 salan teqiya

Hewlêr (Rûdaw) - Kaniya Spî ya ku li ser sînorê Başûrê Kurdistanê ye, piştî 7 salan ji hişkesaliyê careke din teqiya.

Ava kaniyê ku bi bereketa baran û berfa îsal bi gur diherike, ji bo gundê Êkmalê yê navçeya Qilabanê ya Şirnexê bûye çavkaniya jiyanê.

Welatiyê bi navê Şêxmûs Sak kêfxweşiya xwe anî ziman û got:

“Xwedê îsal kerem li gel me kir û av û derav zêde bûne. Ev 7 sal in ev av ziwa bûbû û nedihat.

Îsal Xwedê kerem kir û spas ji Xwedê re ku kanî careke din teqiya.

Dibêjin ev Kaniya Spî ya Fileyan e, Fileyên Lêvo.

Fileyên Lêvo berê li vê derê bûn û dihatin vê derê, ev zevî ji xwe re dikêlan û dikirin; genim, birinc, tûtin û tehle.

Piştre payîzê malên xwe bar dikirin û diçûn. Ew niha çûne welatên din û ev ax di destê me de maye.

Em jî ax û milkên wan ji xwe re dikêlin û ajeldariyê li ser dikin.”

Çavkaniyeke sereke ya ava vexwarinê bû

Ji bilî ku çavkaniyeke sereke ya ava vexwarinê bû, xelkê gund beşeke mezin a bax û bostanên xwe û ajelên xwe jî li ber ava vê kaniyê av didan.

Ji ber ziwabûna kaniyê piraniya wan zeviyan beyar mabûn û ajel jî bê av mabûn.

Xelkê gund bi hêvî ne ku teqîna kaniyê dê îsal sûdeke mezin bigihîne wan.

Welatiyekî din ê gundê Êkmalê, Hisên Sak jî got, “Ev zêdetirî 100 sal in em li ser vî gundî ne.

Berê File li vî gundî bûn. Em niha li Kaniya Spî ne û ev kanî ya Fileyan e. Karê vî gundî li ser ajeldarî û çandiniyê ye.

Jiyana me li ser wan e. Îsal Xwedê xweşî daye û av û deravên me zêde bûne. Spas ji Xwedê re. Xweşî ev e.”

Ji neçarî 14 kîlometreyan xet kişandibûn

Ji ber ziwabûna Kaniya Spî û çavkaniyên din ên avê, gundiyan sala borî ji neçarî û ji dûrahiya 14 kîlometreyan xeteke ava vexwarinê kişandibûn gundê xwe.

Gundê Êkmalê ji 120 malan pêk tê û ji aliyê cografî ve nêzîkî gundê Nizorê yê girêdayî bajarokê Batîfayê yê Îdareya Serbixwe ya Zaxoyê ye.