Çar partiyên Kurd hevpeymanî pêk tînin

Hewlêr (Rûdaw) – Çar aliyên nerazî, Tevgera Goran, Yekgirtû û Komela Îslamî û Hevpeymanî bo Demokrasî û Dadperwerî li ser 4 xalan rêkeftin, ku yek ji wan xalan pêkanîna hevpeymaniyê ye.

Her çar aliyên Tevgera Goran, Hevpeymaniya Bo Demokrasî û Dadperweriyê, Yekgirtûya Îslamiya Kurdistanê û Komela Îslamiya Kurdistanê îro li Silêmaniyê civînek saz kirin.

Van aliyên ku ji encamên hilbijartinên Parlamentoya Iraqê nerazî ne, piştî civînê bi daxuyaniyeke hevpar ragihandin, ku wan li ser 4 xalan lihev kirine.

Xalên rêkeftina herçar aliyan wiha ne:

1- Ji bo herçar fraksiyonan pêkanîna hevpeymaniyekê.

2- Dariştina karnameyekî hevbeş ji bo hevpeymaniyê, ku di xizmeta berjewendiyên giştî û bergîririna mafên destûrî yên gelê Kurdistanê de be û xizmeta bisazîkirina peywendiyên di navbera Herêma Kurdistanê û hikûmeta federal a Iraqê bike.

3- Di guftûgoyên pêkanîna hikûmeta nû ya Iraqê de ev hevpeymanî pêdagiriyê li ser çareserkirina pirsgirêkên di navbera Herêma Kurdistanê û hikûmeta federal de û herwiha mafên destûrî yên gelê Kurdistanê bike. Bi taybetî ji bo vegerandina rûmet û îdareyeke hevbeş ji bo navçeyên nakok, çareserkirina pirsgirêka bûdce, mûçe û şayisteyên darayî yên gelê Herêma Kurdistanê, pêkanîna deste û saziyên ku bidestxistina mafên gelê Kurdistanê misoger dikin.

4- Ev hevpeymanî li ser asta Iraqê jî daxwaza pêdaçûna tavahiya pêvajoya siyasî û idarî ya Iraqê dike, ku di qonaxa nû de li ser bingeha şîrîkatî, lihevkirin, hevsengî, dewleta hemwelatîbûnê, maf û xizmetguzarî, şefafiyet, sazîbûn û serweriya yasa were binyadanîn.

Hêjayê gotinê ye, ku her çar aliyên Tevgera Goran, Hevpeymaniya Bo Demokrasî û Dadperweriyê, Yekgirtûya Îslamiya Kurdistanê û Komela Îslamiya Kurdistanê tevde xwediyê 11 kursiyên Parlamentoya Iraqê ne.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger