BEDLÎS - Li dijî PKKyê operasyon: Teqîn çêbûn
Hewlêr (Rûdaw) - Li navçeyên Hîzan û Tetwanê yên parêzgeha Bêdlîsê ya Bakurê Kurdistanê, li dijî gerîlayên PKKyê operasyona leşkerî hat destpêkirin.
Artêşa Tirkiyê tevî pêvajoya çareseriyê û ragihandina agirbestê ya ji aliyê PKKyê ve operasyonan li Bakur û Başûrê Kurdistanê berdewam dike.
Li gorî Ajansa Mezopotamyayê îro li gelek herêmên bejahî yên navçeyên Tetwan û Hîzanê yên Bedlîsê operasyona leşkerî hatiye destpêkirin.
Di çarçoveya operasyonê de li zozanên li sînorên gundê Şênê yê navçeya Hîzanê çûn û hatin hatiye qedexekirin.
Li gorî agahiyên ji çavkaniyên herêmî hatine wergirtin, di dema operasyonên li zozanên Lerzek, Mihîr, Birîsor û Karasuyê yên li gundê Şênê de teqîn çêbûn û li herêmê tevgereke zêde ya leşkerî heye.