Dengê dilê Qamişloyê: 'Başûrê Kurdistanê em bi tenê nehiştin'

Qamişlo (Rûdaw) – Karwanê alîkariyên mirovî yê kampanyaya "Renca Rûdawê" bi serkeftî gihîşt bajarê Qamişloyê yê Rojavayê Kurdistanê.

Ev alîkariyên ku bi hevkariya Dezgeha Xêrxwaziyê ya Barzanî (BCF) li xelkê koçber tên belavkirin bûne hêviyek mezin ji bo bi hezaran malbatên koçber û hejar.

Gihîştin û dabeşkirin

Roja çarşemê êvarî, 40 barhilgirên tije alîkarî gihîştin Qamişloyê. Roja pêncşemê serê sibê, ev barhilgir li du embarên mezin ên BCFyê hatin valakirin.

Zêdetirî 50 karkerên xwebexş ên xelkê Rojavayê Kurdistanê bi coş û dilxweşiyeke mezin alîkarî danîn û amade kirin.

Karkerên xwebexş spasiyên xwe ji xelkê Başûrê Kurdistanê û Tora Medyayî ya Rûdawê re anîn zimên ku di van rojên dijwar de ew bi tenê nehiştine.

Kî sûdê jê dibîne?

Alîkariyên ku gihîştine, ji bo 40 hezar malbatan hatine terxankirin li koçberên Efrîn û Şehbayê yên ku ji cih û warên xwe bûne û  li xelkê hejar ên bajarê Qamişloyê tên belavkirin.

Dengê xelkê û dilxweşiya wan

Di dema belavkirina alîkariyan de, dîmenên bandorker derketin holê. Welatiyên ku alîkarî wergirtin, bi çavên tijî hêsir û dilên tijî spasdarî hestên xwe anîn zimên:

Jineke koçber got,"Ez spasiya wan dikim, mal û zarokên me bi saya miletê me xweş bûn. Spas ku em ji bîr nekirin."

Her wiha welatiyekî ji Qamişloyê jî got, "Rûdawê dengê me gihand hemû cîhanê, em gelekî spasiya wan dikin."

Jina bi navê Cewher ku bi 11 endamên malbata xwe re dijî û ev cara sêyemîn e koçber dibe, got:

"Gelekî xweş e, Kurdbûn yek e û em pê serbilind in."

Zarokên Qamişloyê jî bi silogan û hezkirinê pêşwaziya tîmên Rûdaw û BCFyê kirin û got,"Em ji Rûdawê hez dikin."

Amarên giştî yên kampanyayê

Kampanyaya "Rencê Rûdawê" ku ji aliyê pêşkêşkarê Rûdawê Renc Sengawî ve hatibû destpêkirin, di nava 4 rojan de alîkariyeke mezin hat komkirin ku 126 barhilgir alîkarî li xwe digire ku mîqdara alîkariyê 1,500 ton xwarin û pêdiviyên jiyanê pêk te.

Ev kampanya careke din nîşan da ku di demên teng de, Kurd pişta hevdu bernadin û sînoran nas nakin.

Gihîştina van alîkariyan ne tenê têrkirina zikê hejaran e lê peyameke xurt a yekîtî û piştevaniya neteweyî ye di navbera Kurdan de.