Hewlêr (Rûdaw) - Li parêzgeha Meletî ya Bakurê Kurdistanê ji ber belavbûna vîrûsa koronayê 3 tax hatin kerentînekirin. Herwiha li navçeya Sason a Êlihê gundek hat kerentînekirin.
Îro Sêşemê, 3 taxên bajarokên Darende, Hekîmxan û Erepgîr ji ber belavbûna vîrûsa koronayê hatin kerentînekirin û çûn û hatina bo wan her 3 taxan hat qedexekirin.
Roja Yekşema derbasbûyî çend kes ji derveyî welat vegeriyan Meletiyê û bi mêvanî çûne malên kes û karên xwe yên li wan hersê taxan.
Piştî demekê ji ber bilindbûna pileya germaya laşê wan 5 kes bo nexweşxaneyê hatin veguhestin.
Piştî ku derket encama testa wan pozîtîv e, ew hersê taxên ku serdana wan kiribûn hatin kerentînekirin. Cendirmeyan rêyên wan taxan kontrol kirine û heta 14 rojan rê nadin çûn û hatina kesî.
Herwiha her îro Qewmiqamiya Sasonê ragihand ku ji ber metirsiya belavbûna koronayê gundê Tizî hate kerentînekirin.
