Cotkarekî Midyadî 20 donim erdê xwe yê hişk kir baxê fêkiyan

 

Mêrdîn (Rûdaw) – Li navçeya Midyadê ya Mêrdînê yê Bakûrê Kurdistanê cotkarekî 20 donim erdê xwe yê hişk kir baxê fêkiyan.

 

Adil Şahîn ê ku li rex TOKÎya li taxa Baglarê 20 donim erdê wî heye ji AAyê re got:


"Dema ku min li hin ciyan rez û bax dîtin, ez fikirîm û min ji xwe re got ku ez jî dikarim li ser erdê xwe tiştekî wiha bikim. Min ewil wekî hobî ev kar kir, lê şûnde min ji bajar û navçeyên cuda cuda şitilên gûz, hurmî, gêlaz, hinar, hejîr, zeytûn, tû, sêv û hwd peyda kirin û li ser erdê xwe danîn û a niha jî ez jê ber digrim."

Şahîn destnîşan kir ku wî bêyî alîkariya sazî û dezgehan, tenê bi derfetên xwe li ser erdê xwe fêkiyan hildiberîne û wiha dewam kir:

"Min hezkirina xwe ya daran ji hedîsa Cenabê Pêxember a, "Heke ku di destê we de şitilek hebe, ger qiyamet rabe jî, teqez wê biçikînin" wergirt û ji xwe re kir nimûne. Ez dixwazim ku her kes çandina daran ji xwe re wekî erkekî bihesibîne. Heya ku emrê min hebe ezê daran biçînim."