Qalîbaf: Dorpêça deryayî ya li ser Îranê bi ser nakeve

Hewlêr (Rûdaw) - Serokê Parlamentoya Îranê ragihand ku hewldanên Amerîkayê yên ji bo dorpêçkirina deryayî ya Îranê bi ser nakevin.

Serokê Parlamentoya Îranê Mihemed Baqir Qalîbaf amaje bi dirêjiya sînorên Îranê kir û got, "Serkeftî bin di dorpêçkirina welatekî de ku sînorên wî yên wisa hebin."

Mihemed Baqir Qalîbaf li ser hesabê xwe yê Xê peyamek belav kir û di peyama xwe de rexne li hewldanên Washingtonê girtin ku dixwaze Îranê dorpêç bike.

Qalîbaf di peyama xwe de cografyaya Îran û Amerîkayê da ber hev û wiha nivîsand:

"Eger hûn du dîwaran ava bikin, yek ji New Yorkê heta beravên rojava û ya din jî ji Los Angelesê heta beravên rojhilat, dirêjiya wan a giştî digihêje 7 hezar û 775 kîlometreyî.

Ev hîn jî nêzîkî hezar kîlometreyî ji dirêjiya giştî ya sînorên Îranê kêmtir e."

Serokê Parlamentoya Îranê bangî Wezîrê Şer ê Amerîkayê Pete Hegseth kir û got:

"Têbinî ji bo Pete Hegseth: Kîlometreyek wekî 0,62 mîlî ye."

Ji 28ê Sibata borî ve û li gel destpêkirina şer Tehranê Tengava Hurmizê girtiye.

Vê yekê tevgera keştiyên bazirganî û veguhastina deryayî ya li wê herêma stratejîk rawestandiye.

Wekî bersivekê ji bo vê gava Tehranê, Washingtonê ji 13ê Nîsanê ve rêzedorpêçên tund danîne ser keştî û benderên Îranê.

Armanca van dorpêçan birîna çavkaniyên darayî yên Îranê ye û neçarkirin e ku vegere ser maseya dan û standinan.