Hewlêr (Rûdaw) - Li gorî amarên fermî yên welatên herêmê, Îranê di nava du rojan de bi 1311 mûşekên balîstîk, kruz û dronan êrişî çend welatên Ereban kiriye.
Her çend Tehran dibêje ku armanca wan baregehên Amerîkayê ne jî zerereke mezin gihiştiye balafirgeh, bender û deverên sivîlan.
Van êrişan roja şemiyê (28ê Sibatê) dest pê kir.
Êriş wekî bersiveke Tehranê ya li hemberî êrişa berfireh a Amerîka û Îsraîlê ne ku tê de gelek berpirsên bilind ên Îranê hatibûn kuştin.
Li gorî amaran, Îmarat herî zêde rastî êrişan hatiye û piştî wê jî Kuweyt û Behreyn tên.
Hûrgiliyên êrişên li ser welatan ev in:
Îmarat: 708 mûşek û dron
Wezareta Parastinê ya Îmaratê ragihand ku 167 mûşek (165 balîstîk û 2 kruz) û 541 dronên Îranê arasteyî xaka welatê wan hatine kirin.
Pergala parastinê ya Îmaratê karîbûye piraniya wan têk bişikîne.
Lê belê 35 dron li nav xaka wan ketine û zererên madî çêbûne.
Kuweyt: 380 mûşek û dron
Artêşa Kuweytê eşkere kir ku ji Îranê 97 mûşek û 283 dron arasteyî welatê wan hatine kirin.
Ji ber ku li asman hatine têkşikandin, paşmayên mûşekan li çend deverên cuda ketine.
Di encamê de zerereke madî gihîştiye hinek saziyan.
Behreyn: 95 mûşek û dron
Artêşa Behreynê ragihand ku pergala parastina asmanî rûbirûyî 61 mûşek û 34 dronan bûye.
Artêşê diyar kir ku wan ew bi serkeftî têk şikandine.
Qeter: 77 mûşek û dron
Wezareta Parastinê ya Qeterê ragihand ku 65 mûşekên balîstîk û 12 dron arasteyî welatê wan hatine kirin.
Ji ber tundiya êrişan, du mûşek gihîştine baregeha "Udeyd"ê û dronekê jî li radareke hişyariya pêşwext xistiye.
Di van êrişan de ti xisarên canî çênebûne.
Urdin û Uman
Artêşa Urdinê rûbirûyî 49 dron û mûşekên balîstîk bûye ku arasteyî xaka wan hatibûn kirin.
Li Umanê jî bendera bazirganiyê ya "Duqm"ê bi du dronan bûye armanca êrişê.
Erebistana Siûdî: Êrişeke berfireh
Wezareta Karên Derve ya Erebistana Siûdî êrişên Îranê yên li ser herêma Riyadê û herêma rojhilat şermezar kirin.
Wezaretê hejmara hûr û kûr a mûşek û dronan eşkere nekir lê destnîşan kir ku hêzên wan rûbirûyî êrişan bûne.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse