Dr. Azad Elî behsa stratejiya nû ya Amerîkayê li Sûriyê dike.
Hewlêr (Rûdaw) - Di lêkolînekê nû ya Navenda Lêkolînan a Rûdawê de, xalên giştî yên stratejiya Amerîkayê hatin destnîşankirin. Serokê Navenda Lêkolînan a Rûdawê Dr. Azad Elî jî dibêje, Amerîka giringiyeke zêde dide hêzên Kurdî û Rojavayê Kurdistanê.
Serokê Navenda Lêkolînan a Rûdawê Dr. Azad Elî îro di bultena taybet bi Rojavayê Kurdistanê de amade bû û li ser stratejiya nû ya Amerîkayê li Sûriyê û Rojavayê Kurdistanê axivî.
Dr. Azad Elî beşek ji zanyariyên wê lêkolîna ku li ser stratejiya Amerîkayê li Sûriyê ji aliyê Navenda Lêkolnînan a Rûdawê hatiye encamdan, aşkere kir.
Bi gotina Dr. Azad Elî pêc xalên sereke di stratejiya Amerîkayê ya ji bo Sûriyê de hene û wiha behsa wan xalan kir:
Xala Yekem: Zêdekirina hêzên Amerîka li bakurê Sûriyê
Hejmara hêzên Amerîkî li rojavayê Kurdistanê û bakurê Sûriyê gihaye 1000 serbazî û biryar e 1000 serbazên din jî bişîne rojavayê Kurdistanêû bakurê Sûriyê.
Xala Duyem: Damezrandina binkeyên leşkerî li Rojavayê Kurdistanê
Binkeyên leşkerî yên Amerîkayê li Rojavayê Kurdistanê hatine damezrandin û têne berfirehkirin. Yek ji wan bingeha li Kobanî ye, li gundê Xerab Hişkê, ya din li Rimêlan, herwiha li Eyn Îsa jî, bingeheke leşkerî ya Amerîkî heye.
Xala Sêyem: Bicihkirina topxaneya Amerîka
Amerîka topxaneya giran li bakurê Sûriyê bicih kiriye û ew topxane di topbarankirina cih û binkeyên DAIŞê de tê bi kar anîn.
Xala Çarem: Rawestandina pêşveçûna Tirkiyê û hikûmeta Sûriyê
Hêzên Amerîka rê li pêş opozisyona Sûriyê û artêşa Tirkiyê girt da ku derbasî nav bajarê Minbic nebin. Herwiha, Amerîka hêzên xwe bi Helîkopteran daxistin rojavayê Tebqayê da ku hêzên hikûmeta Sûriyê û hevalbendên wê nikaribin ber bi Reqa ve pêşde biçin.
Xala Pêncem: Girîngiriya hêzên Kurdî ji bo Amerîkayê
Amerîka alîkariyên xwe ji bo HSD, ku YPG hêza wê ya sereke ye, zêde kiriye û tekez dike ku ew hêz li bakur û rojhilatê Sûriyê di şerê DAÎŞê de wê roleke sereke bilîze.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse