Hewlêr (Rûdaw) - Sibehê zû careke din barana mûşekên Îranê Îsraîl kir hedef.
Li gorî medyaya Îsraîlê, li herêmên navendî, li Qudisê û li hinek deverên bakur zengilên hişyariyê lê daye.
Di encama van êrişan de birîndar hene û zererên madî çêbûne.
Zengilên hişyariyê
Rojnameya Yedioth Ahronothê ya Îsraîlê ragihand ku ji Îranê ber bi navenda Îsraîlê û Qudisê ve mûşek hatine berdan.
Zengilên metirsiyê yên ji bo mûşek û roketan li herêmên navendî, li Qudisê û li hinek deverên Şerîeya Rojava lê da.
Her wiha li bakurê welêt, li bajarokên Ortal û Eyn Zivanê yên li Girên Golanê û li deverên Gonen, Lehavot HaBashan û Shamir ên Celîleyê gel hat hişyarkirin.
Mûşekên komikî hatin bikaranîn
Di nûçeyê de hat îdiakirin ku di vê êrişa dawî de mûşekên komikî (cluster missiles) jî hatine bikaranîn.
Li herêma Sharonê dengê teqînên gelekî bihêz hat bihîstin.
Hat eşkere kirin ku li herêma Kefir Qasimê ya li navenda Îsraîlê mûşek li avahiyekê ketiye û çend kes birîndar bûne.
Zêdetirî 1340 kuştiyan
Aloziya li herêmê ji 28ê Sibatê ve gurtir bûye û bêrawestan didome.
Piştî ku Amerîka û Îsraîlê operasyoneke hevbeş bir ser Îranê, heta niha li Îranê zêdetirî 1340 kesan mirine.
Di nav kuştiyan de Rêberê Îranê Elî Xamineyî jî heye.
Tolhildana Îranê û bandora li ser herêmê
Tehran bi dron û mûşekan bersivê dide van êrişan.
Îran ne tenê li Îsraîlê, li Urdin, Îraq û wan welatên Kendavê jî dixe ku baregehên Amerîkayê li wan hene.
Ev êriş dibin sedema zererên mezin ên binesaziyê û her wiha bandoreke neyînî li bazarên cîhanî û geştên balafiran dikin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse