Hewlêr (Rûdaw) - Aloziyên leşkerî yên li Rojhilata Navîn zêde dibin û biryareke krîtîk a ku dê bandoreke rasterast li ser rêyên enerjî û bazirganiyê yên cîhanî bike hat dayîn.
Supaya Pasdaran a Îranê ragihand ku Tengava Hurmizê ya ku yek ji rêyên avî yên herî stratejîk ên cîhanê ye li ber hatûçûna deryayî bi temamî hatiye girtin.
Li gorî nûçeya Reutersê ku dispêre medyaya xwecihî ya Îranê, dê li dijî hemû wan keştiyên deryayî yên ku bixwazin di tengavê re derbas bibin tedbîrên tund werin bicihkirin.
Di daxuyaniya Supaya Pasdaran de hat gotin, "Her keştiyên ku derbas bibe dê rastî tedbîrên tund bê" û hat destnîşankirin ku dê ev biryar bêyî nermî û tawîzan bê bicihanîn.
"Hemû veguhastin hatin qedexekirin"
Rayedarên Îranê eşkere kir ku hemû çalakiyên bazirganiyê yên ku bi Îsraîl û Amerîkayê re pêwendîdar in dibin hedef.
Di daxuyaniyê de hat diyarkirin, "Hemû çalakiyên veguhastinê yên ji bo benderên dijminên me yên Îsraîl û Amerîkayê û her wiha hevalbend û piştgirên wan hatine qedexekirin."
Di vê çarçoveyê de hat destnîşankirin ku dê çi korîdor bê bikaranîn bila bibe, ew dê rê li ber veguhastinên ji bo wan welatan bigirin.
Serdema derbasbûna kontrolkirî bi dawî bû
Piştî êrişên Amerîkayê yên li ser Îranê, birêvebiriya Tehranê demeke bû ku li Tengava Hurmizê pêvajoya "derbasbûna kontrolkirî" dimeşand.
Lê belê bi kûrbûna şer û pevçûnên li herêmê re, dawî li vê pêvajoyê hat û bi fermî hat ragihandin ku tengav bi temamî hatiye girtin.
Ev biryar tê wê wateyê ku ew rêya ku beşeke girîng a petrol û gaza xwezayî ya cîhanê tê re derbas dibe ji kar ket.
3 keştî hatin vegerandin
Hat ragihandin ku piştî hişyariyên Hêzên Deryayî yên Supaya Pasdaran ên îro, 3 keştiyên konteyneran ên welatên cuda neçar mane rotaya xwe biguherînin.
Rayedaran careke din ew hişyarî da ku keştiyên pêbendî qedexeyê nebin dikarin rasterast bibin hedef.
Supaya Pasdaran a Îranê diyar kir ku ew daxuyaniyên Amerîkayê yên ku dibêjin "Tengava Hurmizê vekirî ye" ne rast in.
Supaya Pasdaran tekez kir ku tengav di pratîkê de girtî ye û ev biryar li qadê tê pêkanîn.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse