Navenda Lêkolînan a Kendavê: Nêzîkî 6 hezar mûşek û dron avêtine Welatên Kendavê
Hewlêr (Rûdaw) - Serokê Navenda Lêkolînan a Kendavê Dr. Ebdulezîz Seqer diyar kir ku heta 30yê Adara 2026an, 5 hezar û 953 dron û mûşek ji aliyê "Îran û komên çekdar" ve ber bi welatên Kendavê û Urdinê ve hatine avêtin.
Dr. Ebdulezîz Seqer li ser êrişên li Welatên Kendavê ji Rûdawê re axivî.
Seqer hûrguliyên amarên navenda xwe yên taybet li ser êrişên "Îran û komên çekdar" ên li Welatên Kendavê û Urdinê eşkere kirin.
Li gorî amarên navendê, heta 30yê Adara îsal, zêdetirî 5 hezar dron û mûşek ber bi Welatên Kendavê û Urdinê ve hatine avêtin.
Îmarat ku 2 hezar û 343 mûşek û dron ber bi wê ve hatine avêtin di rêza yekem a lîsteyê de ye.
Piştî wê Erebistana Siûdî bi hezar û 112 mûşek û dronan tê.
Amarên êrişên ên li welatên din bi vî rengî ne:
Kuweyt: 930 mûşek û dron
Qeter: 694 mûşek û dron
Behreyn: 565 mûşek û dron
Urdin: 285 mûşek û dron
Uman: 24 mûşek û dron
Serokê Navenda Lêkolînan a Kendavê Dr. Ebdulezîz Seqer got:
"Raporta me bi awayekî hûr xwe dispêre wan amaran ku bi fermî ji aliyê saziyên taybetmend ên wekî wezaretên parastinê, navendên pêwendiyên hikûmî û dezgehên ewlehiyê yên welatan ve hatine belavkirin."
Seqer li ser diyarkirina çavkaniya cografî ya êrişan jî got, "Piraniya daxuyaniyên fermî tenê rûdana êrişê û rûbirûbûna wê belav dikin lê çavkaniya avêtinê yan cihê pêgehan diyar nakin.
Loma me pîvana hedefgirtina meydanî esas girtiye ku fermî ye û dikare were belgekirin."
Êrişên komên çekdar ên Îraqê
Seqer diyar kir ku ew rêjeyeke diyar ji bo êrişên ji axa Îraqê tên kirin dernaxin, çimkî amarên fermî çavkaniya avêtinê yan aliyê kiryar kirine diyar nakin.
Seqer di berdewamiyê jî de got, "Her hewldana me ya ji bo dabeşkirina jimareyan bêyî çavkaniyeke fermî ya hûr, dê bibe texmîn ne ku bibe belgekirin.
Em pêbendî rêbazekî ne ku tê de bi ti awayî şîroveyan li jimareyan zêde nakin heke amarên li ber dest rê nedin."
Çima Îmarat armanca sereke ye?
Li gorî amarên navendê, Îmarat bi rêjeya ji sedî 39,36 di rêza yekem a armanca êrişan de ye. Serokê Navenda Lêkolînan a Kendavê sedemên vê yekê di sê xalan de rêz kirin:
Pêgeha Cografî: Îmarat li herêmeke nêzîkî peravên Îranê û Tengava Hurmizê ye, vê yekê kiriye ku hîn zêdetir li ber gefên cuda yên mûşekî û dronî be.
Aliyê Aborî: Îmarat navendeke giring a aborî û bazirganiya cîhanî ye.
Her gefa li ser ewlehiya Îmaratê bandoreke rasterast li ser lêçûnên tenduristiyê û hejandina bazarên navneteweyî dike.
Armancên Stratejîk: Seqer diyar dike ku ev êriş tenê ji bo wêrankirinê nînin, armanca wan têkdana jîngeha ewlehiyê û têkdana wêneyê aramiya herêmê ye."
Şerê dronan û stratejiya nû
Amarên navendê nîşan didin ku di êrişan de 4 hezar û 576 dron û hezar û 377 mûşek hatine bikaranîn.
Dr. Ebdulezîz Seqer vê yekê wekî "guherîna stratejîk" bi nav kir û got,"Dron lêçûna wan kêmtir e û ji bo şerê bêtaqetkirin û çêkirina zexta berdewam guncawtir in.
Li hember de, mûşek lêçûna wan zêdetir e û ji bo armancên gurkirina leşkerî ya mezintir tên bikaranîn."
Ji bo paşeroja ewlehiya herêmê 3 senaryo
Serokê Navenda Lêkolînan a Kendavê 3 senaryo ji bo sala 2026an pêşkêşî Rûdawê kirin:
Domandina aloziyan: Heke ti peymana agirbestê ya herdemî pêk neyê, êriş dê bi rîtmeke guherbar bidomin.
Arambûna demkî: Heke têgihîştineke siyasî yan peymaneke ewlehiyê ya nerasterast pêk were, îhtimal heye êriş kêm bibin.
Gurkirina nişkave: Heke rêyên aramkirinê ji kar bikevin yan rûdaneke mezin li herêmê bibe, wê demê îhtimala bikaranîna amûrên guvaşa tundtir heye.
Ebdulezîz Seqer peyama xwe bi vî rengî qedand, "Navçeyê hîn qonaxa metirsiyê derbas nekiriye û li ber jîngeheke ewlehî ya necihêgir e ku tê de mîlmanî di navbera bersivdan û dan û standinan de tên û diçin."