Îran: Em ji bo ewlehiya sînoran bi Hewlêr û Bexdayê re di nav pêwendiyan de ne

Hewlêr (Rûdaw) - Îranê ragihand ku derbarê ewlehiya sînoran de "pêwendiyên wan ên berdewam" bi hikûmeta federal a Îraqê û Hikûmeta Herêma Kurdistanê re hene.

Îranê destnîşan kir ku di dema nakokiyên dawî yên Tehranê û aloziyên herêmê de, hevahengî xurttir bûne.

Berdevkê Wezareta Karên Derve ya Îranê Îsmaîl Beqayî di konferansa rojnamegeriyê ya heftane de axivî.

Beqayî diyar kir ku hevahengiya wan a bi Bexda û Hewlêrê re di çend hefteyên borî de jî domiye.

Beqayî ev hevkarî wekî karekî "erênî û sûdbexş" bi nav kir.

Beqayî her wiha got, "Tiştekî xwezayî ye ku em li ser mijarên sînoran di nava pêwendiyên berdewam de bin.

Em bi cîranên xwe yên Îraqî û dostên xwe yên li Herêma Kurdistana Îraqê re tim di nava pêwendiyê de ne."

Wî amaje pê kir ku pêwendî di dema "şerê sepandî yê 20-30 rojên borî" de jî qut nebûne.

Beqayî da zanîn ku hemû alî fêm dikin ku neseqamgiriya li deverên sînorî dikare bandorê li hemû herêmê bike.

"Dê bandorê li hemû welatên herêmê bike"

Li gorî gotinên Beqayî, "Her nearamî li deverên derdorê, dê bandor û encamên xwe ji bo hemû welatên herêmê hebin."

Berdevkê Îranî destnîşan kir ku lihevtêgihîştina hevpar a di navbera Tehran, Bexda û Hewlêrê de "zemîneke baş" ava kiriye.

Ev zemîn ji bo hevkariyeke berfirehtir e da ku rê li ber wan karan bê girtin ku dibe bibin gef ji bo ewlehiya Îran û Îraqê.

Peymana ewlehiyê ya 2023yan

Daxuyaniyên Beqayî di demekê de tên dayîn ku aloziyên herêmê di asteke bilind de ne.

Ev yek piştî çendîn mehên nakokiyên di navbera Îran, Amerîka û Îsraîlê de pêk tê.

Her wiha dilgiraniyên Tehranê yên derbarê partiyên Rojhilatê Kurdistanê de jî careke din nû bûne.

Tehranê çend caran daxwaz kiriye ku peymana ewlehiyê ya navbera Îran û Îraqê bi temamî bê bicihanîn.

Ev peyman 2023yan hatibû îmzekirin û armanca wê rêgirîkirina li çalakiyên çekdarî yên li ser sînoran e.