Li gelek deverên Tehranê teqîn çêbûn
Hewlêr (Rûdaw) - Îran di bin êrişên Amerîka û Îsraîlê de ye.
Hat ragihandin ku li Tehrana paytexta Îranê li pey hev dengê teqînên dijwar hatiye bihîstin.
Li gorî Ajansa Nûçeyan a Farsê, teqîn li herêmên 1ê, 4an, 11an, 13an û 21ê yên bajêr pêk hatine.
Cihê teqînan hatin eşkerekirin
Li gorî agahiyên destpêkê, li herêma 1ê li Rêbeja Şehîd Babayî û Kolana Şehîd Lengerî teqîn çêbûne.
Li herêma 4an li dawiya Rêbeja Şehîd Babayî û derdora Qada Herawiyê teqîn pêk hatine.
Her wiha li herêma 11an li Kolana Hafiz û Xaçerêya Cumhuriyetê dengê teqînan hatiye bihîstin.
Li herêma 13an li Kolana Pîrozî û li herêma 21ê jî li derdora Germdereyê teqîn çêbûne.
Hat diyarkirin ku piştî teqînan, pergalên parastina asmanî yên li herêmê ketine dewrê.
Kerec û Urmiye jî bûn hedef
Ji aliyê din ve, bajarê Kerecê ji aliyê balafirên şer ve hat armanckirin.
Li Urmiyeyê jî li avahiyeke sivîlan hat xistin.
Hat tomarkirin ku xebatên lêgerîn û rizgarkirinê yên li wê avahiyê didomin.
Artêşa Îsraîlê beriya niha daxuyaniyek dabû.
Artêşê eşkere kiribû ku wan li paytexta Îranê dest bi pêleke berfireh a êrişan kiriye.