Nêçîrvan Barzanî û Heybet Helebûsî behsa hevahengiya Hewlêr û Bexdayê kir

Hewlêr (Rûdaw) – Di civîna Serokê Herêma Kurdistanê Nêçîrvan Barzanî û Serokê Parlamentoya Îraqê Heybet Helebûsî de daxwaza hevahengiya Hewlêr û Bexdayê hat kirin.

Serokê Herêma Kurdistanê Nêçîrvan Barzanî îro di çarçoveya serdana xwe ya li Bexdayê de bi Serokê Parlamentoya Îraqê Heybet Helebûsî re civiya.

Girîngiya hevahengiya Hewlêr û Bexdayê

Di civînê de rewşa siyasî û yasayî ya welêt û rola saziya yasadanînê ya di piştevaniya aramiyê de hatin gotûbêjkirin.

Her du aliyan bal kişand ser girîngiya lihevtêgihiştina di navbera hêzên siyasî û hevahengiya di navbera Hewlêr û Bexdayê de.

Hat destnîşankirin ku ji bo derbaskirina astengiyan û xizmeta berjewendiyên giştî yên welêt ev hevahengî pêwîst e.

"Divê qonaxa bê li ser bingeha hevpariya rasteqîn be"

Her du aliyan diyar kir ku divê qonaxa bê li ser bingeha hevpariya rasteqîn be.

Her wiha xebatên ji bo qebûlkirina yasayên niştimanî yên ku mafên destûrî yên hemû pêkhateyan diparêzin, wekî erkên pêşîn ên parlamento û hikûmetê hatin dîtin.

Di heman demê de ji bo çareserkirina pirsgirêkan a li ser bingeha destûrê û parastina mafên welatiyan daxwaza yekxistina nêrînan hat kirin.

Rewşa herêmê û dûrketina ji aloziyan

Rewşa herêmê, bandor û encamên wê jî bûn beşeke din a gotûbêjên civînê.

Di vê mijarê de tekezî li ser parastina aramî û berjewendiyên bilind ên Îraqê hat kirin û hat xwestin ku Îraq ji aloziyên herêmê dûr bimîne.