Nêçîrvan Barzanî û Balyozê Brîtanyayê rûdanên li herêmê gotûbêj kirin

Hewlêr (Rûdaw) – Serokê Herêma Kurdistanê Nêçîrvan Barzanî û Balyozê Brîtanyayê yê Îraqê Îrfan Sidîq rewşa navxweyî û rûdanên herêmê gotûbêj kirin

Serokê Herêma Kurdistanê Nêçîrvan Barzanî îro li Bexdayê bi Balyozê Brîtanyayê yê Îraqê Îrfan Sidîq re civiya.

Serokatiya Herêma Kurdistanê derbarê civînê daxuyaniyek da.

Rewşa navxweyî û rûdanên herêmê

Li gorî daxuyaniyê di civînê de pêvajoya siyasî ya welêt û gavên avakirina hikûmeta nû ya federal hatin gotûbêjkirin.

Her wiha ziyaret û hevdîtinên Serok Nêçîrvan Barzanî yên li Bexdayê yên bi serkirdeyên Îraqî re hatin nirxandin.

Rewşa navxweyî ya Herêma Kurdistanê û rûdanên herêmê mijarên din ên civînê bûn.

Hevahengiya bi aliyên Îraqî re

Her du alî li ser girîngiya hevahengî û hevkariya hevbeş a Herêma Kurdistanê ya bi aliyên Îraqî re hemfikir bûn.

Wan diyar kir ku ev hevkarî ji bo serxistina pêvajoya siyasî û avakirina hikûmeta bê ya federal girîng e.

Hat xwestin ku hikûmeta nû bibe neynika daxwazên welatiyan, karibe rûbirûyî astengiyan bibe û serweriya welêt biparêze.

Piştgiriya Brîtanyayê

Balyozê Brîtanyayê ducare kir ku welatê wî girîngiyê dide pêwendiyên xwe yên bi Îraq û Herêma Kurdistanê re.

Nêçîrvan Barzanî ji ber piştgiriya ji bo Îraq û Herêma Kurdistanê spasiya Brîtanyayê kir.

Di beşeke din a civînê de bandor û encamên şer ên li herêmê û çend mijarên din ên girîng hatin gotûbêjkirin.