Hewlêr (Rûdaw) – Milîsên şîe ku wek Heşd el-Şeibî tên nasîn, dibêjin, dê heta hefteya bê tevahiya parêzgeha Selahedînê ya Iraqê ji destê DAIŞê were derxistin.
Zêdetirî 2 hefteyan e operasyona standina parêzgeha Selahedînê bi taybet bajarê Tikrîtê ji aliyê hêzên artêşa Iraqê û milîsên şîe ve didome.
Berdevkê Heşd el Şeibî, Kerîm Nûrî ji Rûdawê re got, Hewza Hemrînê, Tilgesêbe, bajarokê Elem, Dor, Elboecîl û gellek deverên din ên dora bajarê Tikrîtê ji destê çekdarên DAIŞê hatine standin.
Kerîm Nûrî diyar kir, ji ber ku çekdarên DAIŞê her derê bajarê Tikrîtê tijî mîn û bombe kirine ew nikarin derbasî nav bajêr bibin û wiha got: “Lê emê hefteya bê tevahiya parêzgeha Selahedînê bigirin.”
Li ser çek û cebilxaneya ku milîsên şîe û hêzên Iraqî di şerê Tikrîtê de bikar tînin jî Nûrî got, heman çekên ku di şerê Silêman Beg, Seidiye, Celewla, Zilûiye û Ceref Sexrê de hatibûn bikaranîn di şerê Tikrîtê de jî tên bikaranîn.
Berdevkê milîsên şîe, li ser hebûna fermandeyê hêza Quds a pasdarên Îranê Qasim Sulêmanî di şerê Tikrîtê de jî got, Qasim Sulêmanî jî mîna şêwirmendên amerîkî û ewropî karê xwe dike. Pêwîsitya me bi wî heye ji ber ku ezmûna wî di şer komên çekdar de zêde ye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse